ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт

Коркин турнира: иккис күн түмүгэ

4 октября 2015, 21:29
Улуу тренер Дмитрий Петрович Коркин кэриэһигэр көҥүл тустууга норуоттар икки ардыларынааҕы турнир иккис күнүгэр – 61, 70, 86 уонна 125 кг ыйааһыннаах бөҕөстөр көбүөргэ таҕыстылар.
photoByWidth&id=46224&width=1000
61 кг – биир саамай эрэммит ыйааһыммыт. Вячеслав Ефремов, Ньургун Скрябин, Андрей Бекренев, Егор Пономарев мэтээл иһин тусталарыгар эрэл улахан этэ. Биир сытыы киирсиинэн биир бөлөххө түбэспит В.Ефремов уонна Нь.Скрябин киирсиилэрэ буолла. Бу киирсиигэ Ефремов очконан баһыйан иһэн, күлүүстээһин албаһыгар киирэн, ыраастык хотторон, элбэх киһини соһутта.
Уопсайынан, Скрябин – китаеһы (12:0), Ефремовы ыраастык уонна Бекреневы (3:0) кыайталаан финалга таҕыста.
Бу ыйааһыҥҥа хайдах эрэ Саха сирэ – Бурятия маастардарын миро-матчтара буолла диэххэ сөп. Ол курдук, ыалларбыт Айсуев, Шарастепанов, Батоев, Гергенов курдук күүстээх бөҕөстөрү аҕалбыттар. Онуоха Шарастепанов – Револий Самсоновпытын, Батоев – Владислав Ефимовпытын уонна Егор Пономаревпытын, Айсуев – Иван Свешниковпытын хотон, сирэй көрсүү ахсаанынан биллэрдик тупсардылар. Ону ааһан бэйэлэрин утары киирсиилэригэр Батоев – Айсуевы, Шарастепанов – Батоевы кыайталаатылар. Манна Шарастепанов Батоевы 10:0 кыайыыта хайдах эрэ саарбахтааһыны үөскэттэ. Россия сүүмэрдэммит хамаандатын чилиэнэ Батоев киһитигэр соруйан хотторботоҕо буолуо дуо? Итинэн Егор Пономарев салгыы тустар бырааба быһыллан хаалла.

photoByWidth&id=46225&width=1000

Онон финал: Ньургун Скрябин (Саха сирэ) – Даша Шарастепанов (Бурятия) Барыллааһын киирсиилэргэ буряттарга күппүлүү барбыт дьон, бу хапсыһыыга кыайдахпытына эрэ санаабыт туолара эрдэттэн биллэр этэ. Бу хапсыһыыга Ньургун 6:4 ахсаанынан кыайан, бу иннинээҕи хотторууларбытын барытын сотон, буряттары баһыйан таҕыстыбыт.

70 киилэҕэ састаап хайдах да буолбутун үрдүнэн, Россия эдэрдэргэ күрэхтэһиитин призердара Герман Устиновка, Иван Ефремовка уонна Тимур Николаевка, Ваир Бурцевка эрэммиппит. Онуоха Ефремов кыттыбата. Амма ыччата Устинов – полягы, Бурцевы кыайан баран, Россия кубогын кыайыылааҕа буола сылдьыбыт опыттаах бөҕөс Ильдус Гиниятуллинныын киирсиитигэр 7:8 ахсаанынан сабырыйтаран кэбистэ. Оттон үһүс бириистээх миэстэн иһин тустууга иллэрээ сыл бу турнир кыайыылаҕынан буолбут тувинец Мортуй Оол Менгини 4:2 ахсаанынан баһыйан, пьедестал үһүс үктэлигэр таҕыста. Тимур Николаев эмиэ үчүгэй өйдөбүлү үөскэттэ.
Бу ыйааһыҥҥа ыалдьыппыт, Россия чемпионатын, эдэрдэргэ Европа түһүлгэтин призердара, 21 саастаах Евгений Жербаев үчүгэй хапсыһыылары көрдөрдө.
86 кг – биир киһилээхпит. Иван Сергин маҥнай китаеһы кыайан баран, финалга тахсар иһин киирсиигэ румын бөҕөһүгэр хотторон кэбистэ. Онон үһүс миэстэни ким ыларын быһаарсыыга Тунис бөҕөһүн кытта көрүстэ. Итиэннэ бастакы түһүмэххэ “накат” диэн албаска түбэһэн, 0:10 ахсаанынан хотторон кэбистэ.
125 киилэҕэ биир да кыттааччыбыт суох. Манна финалга поляк Изамил Изоштек уонна украинец Данил Картавый тустуохтаахтара гынан баран, украинец эчэйиилээх буолан, кыайыыны быһа биэрдэ.

photoByWidth&id=46226&width=1000

Быйылгы турнир биир сонун көстүүтүнэн, финалга тахсыбыт бөҕөстөр аныгы, түһүлгэни киэргэтэн уонна күүрдэн биэрэр инниттэн музыка доҕуһуоллаах, буруо быыһыттан көбүөргэ тахсан кэлэллэрэ буолла. Өссө ол тахсар сирдэригэр экраҥҥа ааттара-суоллара, ханнык хамаандаттан кытталлара суруллара, шоу быһыытынан көһүннэ. Хайдах эрэ буолуохтаах киирсиини күүркэтэн, сытыырхатан биэрэр курдук ылынным. Аны көбүөргэ финал кэмигэр саала уотун арааран баран, тустуу көбүөрүн эрэ чорботон сырдатан, киирсиини ойуччу тутуу эмиэ сонуннук көһүннэ. Онон бастакы сырыыга итинник саҥа киллэриилэр табылыннылар диэххэ сөп.

Итиэннэ биир саҥа, сонун көстүүнэн судьуйалар формалара уларыйбыта буолла. Ол курдук, көбүөргэ тустуу хаамыытын салайан, дьүүллээн ыытааччылар “рефери” диэн суруктаах бары биир өҥнөөх көстүүмүнэн тахсан үлэлээтилэр. Маны, Тустуу аан дойдутааҕы федерациятын салайааччыта Ненад Лалович саҥа киллэриилэрэ диэххэ сөп.

photoByWidth&id=46227&width=1000

Турнир биир ааттаах-суоллаах бөҕөһө, аан дойду экс-чемпиона, Олимпиада призера Радослав Великов тувинец Айхан Ондардыын тустуутугар эчэйии ылла быһыылаах, 4:4 ахсаанынан киирсиигэ хотторуулааҕынан ааҕылынна. Уопсайынан, биллиилээх болгарин “күнэ киэһэрэн эрэрэ” көстөр.

Дмитрий Петрович Коркин аатынан норуоттар икки ардыларынааҕы турнир иккис күнүн түмүгэ:

61 кг (21 кыттааччы): 1. Ньургун Скрябин (Россия, Саха сирэ), 2. Даша Шарастепанов, 3. Булат Батоев (иккиэн – Россия, Бурятия), Андрей Бекренев (Россия, Саха сирэ).
70 кг (13): 1. Евгений Жербаев (Россия, Бурятия), 2. Ильдус Гиниятуллин (Россия), 3. Герман Устинов, Тимур Николаев (иккиэн – Россия, Саха сирэ).
86 кг (9): 1. Туртогтох Лубсандорж (Монголия), 2. Андре Франт (Румыния), 3. Мохамад Саадам (Тунис), Магомед Абдулхаликов (Азербайджан).
125 кг (10): 1. Изамил Изоштек Польша), 2. Данил Картавый (Украина), 3. Шамиль Хакиев, Мухамагази Магомедов (иккиэн – Россия).
photoByWidth&id=46230&width=1000
photoByWidth&id=46229&width=1000
photoByWidth&id=46231&width=1000
photoByWidth&id=46232&width=1000
Онон биир дойдулаахтарбыт бу турнирга үс кыһыл көмүс (В.Рассадин, И.Иннокентьев, Нь. Скрябин), биир үрүҥ көмүс (Э.Григорьев) уонна сэттэ боруонса (Д.Аксенов, А.Контоев, В.Степанов, Е.Алексеев, А.Бекренев, Г.Устинов, Т.Николаев) мэтээли ылары ситистилэр. Барыта 11 араас өҥнөөх мэтээл.      
Просмотров: 844 Комментариев: 0 Автор: Петр Павлов
Стиль и орфография автора сохранены.
Мнение автора может не совпадать с мнением редакции.

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ