Республика киин куоратын кирдээх уу кыһалҕата кыһарыйбыта быданнаата. Сыл аайы халаан кэмигэр уубут дьүһүнэ, амтана мөлтүүр диирбитин кытта үгүстэр сөбүлэһиэхтэрэ.

«Куоракка ууну ыраастыыр собуот наада. Кирдээх уонна өлбөөркөй дьүһүннээх ууну хара бастакыттан өрүстэн хачайдаан ылабыт», - диир Николай Жестков.

Куораттааҕы водозабор 1972 сылтан ыла күн бүгүҥҥэ диэри кыаҕын таһынан үлэлии турар. 5 тыһ. куб. кээмэйдэрдээх 4 резервуары, биир станцияны таһынан бу эбийиэк саҥардылла илик. Водозабор 60 тыһ. кубометр кыамталаах. Оттон куорат наадыйыыта хонон турдахпыт ахсын улаатан, элбээн иһэр. Элбэх мэндиэмэннээх дьиэни тутуу, хаарбах дьиэлэртэн толору хааччыллыылаахха дьону көһөрүү түмүгэр уу тиийбэт кыһалҕатын үөскээтэ.

«Дьокуускайга күҥҥэ 80 тыһ. кубометр уу наада. Уу тиийбэт кыһалҕатын туоратарга 1992 сыллаахха өрүскэ уста сылдьар «Лихтер» насостаах станцияны туруорбуппут», - диир генеральнай дириэктэр.

«Лихтер» ууну өрүс түгэҕиттэн хостуур. Станция куораттааҕы водозабор курдук үлэлиир эрээри, ууну ыраастаабат.

Быйыл кэмниэ-кэнэҕэс кыһалҕа аалын баһа хоҥнуо. Республика Правительствота быһаарбытынан саҥа водозабор бу күһүҥҥүттэн ыла тутуллуоҕа. Тэрилтэ уу тутууларын саҥардан оҥорууга, сууккаҕа 110000 кубометр ууну ыраастыыр эбийиэктэри тутарга сайдыы Европатааҕы баанын кытта дуогабары түһэристэ.

Манна ким генеральнай бэдэрээччит буолара быһаарыллар. «Россия уонна омук дойдуларын 20 тахса компанияларын сайаапкалара киирбиттэр. Ыам ыйын бүтүүтэ кэмбиэр арыллыа, ол кэнниттэн аҕыйах нэдиэлэнэн кыайыылаах ким буолбута ааттаныа. Компания көрүллүбүт үпкэ-харчыга тутуу саҥа технологияларын киллэриэхтээх диэн сүрүн ирдэбил турар», - диэтэ СИА-ҕа Жестков.

Ити барыта бүтэһиктээхтик быһаарыллыбытын эрэ кэнниттэн баан транша киириэҕэ уонна тутуу саҕаланыаҕа. Былаан быһыытынан баһар хомуос бастакы тутуутунан буолуохтаах. Тутуу сыаната барыллааһын ааҕыынан түөрт миллиард кэриэтэ. Ити инникитин.

Оттон билигин Водоканал үөскээбит судургута суох быһыыны-майгыны бэйэтин кыаҕынан туоратарга күһэллэр. Кини көдьүүстээхтик үлэлиэҕин кумах элбэх мэһэйи, харгыһы үөскэттэ. Маныаха араас үлэ барыахтааҕа былааннанар. Куорат олохтоохторо хаһан эрэ ыраас уунан тилэри хааччыллыахтара диэн билиҥҥитэ эрэнэбит эрэ.