Москваттан кэлэр сонуҥҥа бу тула араас санаа: кыһыйыы-абарыы, хомойуу, кэлэйии тыллара үгүстүк этилиннилэр.

Муостаны тутуу болдьоҕун көһөрүүнү эбэтэр букатын да тохтотон кэбиһиини эрэлбит туолбатаҕар тэҥнээтибит. Онтон сылтаан кыыһырдыбыт.

Муостаны тутуу болдьоҕун көһөрүү туһунан бастакы иһитиннэрии ыам ыйын 13 күнүгэр республиканы тилийэ көппүтэ. Ол эрээри суол федеральнай агентствотын салайааччыта  Роман Старовойт Өлүөнэни туоруур муостаны тутуу куонкуруһун кыайыылааҕын - «Транспортные концессии (Саха)» консорциумы кытта концессионнай сөбүлэһиини дьүүллэспитин туһунан иһитиннэрии «Росавтодор» сайтыгар эмиэ ити күн бэчээттэммитэ.

Онно этиллэринэн, бырайыак болдьоммут кэмигэр олоххо киириитин усулуобуйаларын салгыы ырыттыллар.

Икки күн буолан баран тырааныспар миниистирэ  Семен Винокуров :«Бырайыак государство уонна чааһынай партнерство чэрчитинэн тутулларынан, икки сиртэн үбүлэнэринэн уратылаах. Ол курдук, бастакы түһүмэҕин — бырайыактыыр-көрдүүр үлэни уонна тутууну саҕалааһыны концессионер («ТКС»ХЭТ) үбүлүөхтээҕэ, онтон салгыы федеральнай бюджет уйунуохтааҕа», - диэн СИА-ҕа эппитэ.

Куонкурус усулоубуйатын быһыытынан Өлүөнэ өрүһү туоруур муостаҕа государство 40 млдр солк., оттон куонкурус кыайыылааҕа 16 млрд солк. угуохтаахтар.

«Транспортные концессии (Саха) консорциум (кини иһигэр ВТБ, «ВТБ-Капитал», УСК «Мост», о.д.а. тэрилтэлэри киирэ сылдьаллар) ити 16 млрд солк. муоста тутуутун саҕаланыытыгар ороскуоттуохтаах.

Муостаны тутуу болдьоҕун көһөрүүгэ бүтэһиктээх быһаарыы тахса илик. РФ правительствотыгар баҕар оннук буолуон сөп диэн кэпсэтэллэр эрэ.

Росавтодор, о.д.а. федеральнай структуралар урукку өттүгэр ылыллыбыт быһаарыыны көтүрэр, тохтотор санаалара билиҥҥитэ суох. РФ тырааныспарга миниистирэ  Максим Соколов субу соторутааҥҥыта дьоҥҥо-сэргэҕэ: «Уһук Илиҥҥэ тырааныспар инфраструктурата сайдарыгар биһиги интэриэспит улахан, онон бу олоххо киириитин туруулаһыахпыт, туруорсуохпут», - диэбитэ.

Биллэн турар, Россияҕа, аан дойдуга быһыы-майгы уустук. Ону аахсыбат сатаммат эрээри былааска төрдүттэн түөрэн эрэммэт буолар букатын сөбө суох. Федеральнай киин уонна республика табыгастаах, сөптөөх өттүн ырыталлар.