«Халыма ГЭС-ын уута ыытыллыбытыттан сылтаан Үөһээ Халыма уонна Зырянка ууга барда диэн көрдөрөр-иһитиннэрэр тиһиктэр сорох таһаарыыларыгар бэчээттэннэ. Мунньуллубут сиртэн ыытыллыбыт уу кээмэйэ дуона суох. Ол хайдах да халааҥҥа диэри тиэрдэр кыаҕа суох, дьайбат. Ууга былдьаныы сүрүн төрүөтэ хаар ууллуута уонна хас да күн устата ардах түспүтэ буолар», - диэтэ правительство вице-премьерэ Анатолий Скрыбыкин. 

Бэс ыйын 6 күнүгэр буолбут оробуочай мунньахха министиэристибэлэр уонна биэдэмистибэлэр Үөһээ Халымаҕа халаан содулун туоратыыга анаммыт кэлимсэ миэрэлэр тустарынан киэҥник кэпсэттилэр.

Бэс ыйын 5 күнүгэр республика баһылыгын э.т. Үөһээ Халыма улууһугар ыксаллаах быһыыны-майгыны биллэрэр туһунан дьаһалы ылбыта. Онно дьон усулуобуйатыгар, өрөмүөннүүр, чөлүгэр түһэрэр үлэ миэрэлэрэ чуолкайдык быһаарыллыбыттара. 

Халымаҕа уонна Ясачная өрүстэргэ уу аһара эбиллэн Зырянкаҕа, Үөһээ Халымаҕа 1 903 киһи эмсэҕэлээтэ, 177 тэлгэһэ, ол иһигэр сэттэ олорор дьиэ, аэропорт балаһата ууга барда. Тырааныспар инфраструктурата кэһилиннэ. 

Гидрологтар Үөһээ Халымаҕа ардах өссө да, хас да күн түһүөн туһунан сабаҕалыыллар. Ол уу таһымын биллэ үрдэтэрэ чуолкай.