Олохтоох бэйэни салайыныы сэбиэтин мунньаҕын бэбиэскэтигэр улуустарга производственнай кластердары оҥоруу киирбитэ. Бу бырайыагы наукаҕа уонна инновационнай политикаҕа госкэмитиэт иилээбитэ-саҕалаабыта. Маннык кластердары тутууга дьоҕус, орто бизнес түмэ тардыллыахтаах.

Бырайыагы ырытыыга Егор Борисов бу олоххо киириитигэр чопчу механизманар суохтарын ыйда.«Ресурсаны, кыаҕы түмүү туһунан санаа үчүгэй эрээри, баар кыһалҕаны туоратыыга ити тирэҕириэхтээх», - диэтэ кини.  

«Бородууксуйаны харайыы боппуруоһа быһаарыллыбатаҕына, төһөлөөх да хотоннору, теплицалары тутуу уонна олоххо киллэрии көдьүүһэ суох», - диэтэ Е. Борисов.

Республика агропромышленнай комплексыгар баар быһыыны-майгыны кини холобур быһыытынан аҕалла.  

«Үүтү биһиги пастеризациялыыбыт эрэ. Ити бородууксуйа уһун болдьохтоноругар сөбө суох. Күһүн хомуллубут оҕуруот аһын 1-2 ый эрэ устатыгар атыылыыр, батарар кыахтаахпыт. Эти уһуннук тутар кыах сорох улуустарга эрэ баар. Бэйэ хортуоппуйа, оҕуруотун аһа, үүтэ, балыга, этэ тиийбэт. Наадыйыыбытын тилэри толуйбат», - диэн кини бэлиэтээтэ.

Бастатан туран, бородууксуйаны харайар эбийиэктэри тутуохтаахпыт. Государство ону өйүүр. Тыа хаһаайыстыбатын сүрүннүүр министиэристибэ оҕуруот аһын уурар сирдэри тутууга ороскуокка субсидия оҥорор.

«Бородууксуйа ууруллар, харайыллар сирин кыһалҕатын быһаарыахтаахпыт. Ол кэнниттэн бородууксуйаны уларытан оҥоруохтаахпыт. Биллэн турар, ити ороскуота да, үлэтэ да элбэх. Ол эрээри, бүгүн буолбатаҕына сарсын син биир, онно кэлиэхпит», - диэтэ Борисов.