Мунньахха Уһук Илини сайыннарыы министиэристибэтэ  Александр Галушка инники күөҥҥэ тутуллар инвестиционнай бырайыактары государство өттүттэн өйөөһүҥҥэ уонна Уһук Илин эрдэлээн сайдар сирдэрин үөскэтиигэ анаммыт дакылааты оҥордо.  

 Владимир Путин: "Уһук Илин федеральнай уокурук экономическай көрдөрүүтүн быйылгыны уонна былырыыҥҥыны тэҥнээтэххэ, өрө тахсыы баара бэлиэтэнэр. Промышленнай оҥорон таһаарыы быһа холуйан 10 бырыһыанынан, чуолкайдаатахха, 9,2 бырыһыанынан эбилиннэ", - диэтэ. 

 Былырыыҥҥы айылҕа иэдээнин — халаан содулун туоратыыга федеральнай уонна регионнааҕы былаас уорганнарын көдьүүстээх үлэтин түмүгэр эмсэҕэлээбиттэргэ суһаллык көмөлөспүттэрин Владимир Путин эттэ.

 Регион тырааныспарыгар, ис ырыынак инфраструктуратыгар мэһэй суох буолуохтааҕын дойду баһылыга чиҥэтэн эттэ.

Александр Галушка макрорегиону тэтимнээхтик сайыннарыыга дойду президенэ туруорбут соруктарын туолуутун туһунан кэпсээтэ.

 Инвестбырайыактары олоххо киллэрии сүрүн суолталааҕын федеральнай миниистир бэлиэтээтэ. Манна 380 бырайыагы боруобалаабыттар, итинтэн олоххо чахчы киирэр кыахтаах 18 бырайыагы талбыттар. Ити талыллыбыттар ортолоругар Саха сиригэр Инаглинскайдааҕы чох комплексын, Магадаҥҥа Наталкинскайдааҕы көмүс баайдаах сири туһаҕа таһаарыы, Камчаткаҕа Озерновскайдааҕы хайаны байытар кэмбинээти тутуу бырайыактара бааллар.

Ити бырайыактар Уһук Илиҥҥэ 2,5 триллион чааһынай инвестицияны тардыахтаахтар, 40 тыһыынча үлэ саҥа миэстэтин арыйыахтаахтар, 10 сыл устата 675 млрд солк. нолуок быһыытынан хааччыйыахтаахтар. Оттон олоххо киириитигэр 10 сылга 216 млрд.солк. наада. 

 Ону таһынан миниистир эрдэлээн сайдар сир-уот быһыытынан 14 сир талыллыбытын эттэ. Маныаха тустаах сокуон барылын бэлэмнээбиттэр. Бу хайысхаҕа Уһук Илиҥҥэ инники 10 сылга 600 млрд солк. инвестиция быһыытынан киириэхтээх, 35 тыһыынчаттан тахса үлэ саҥа миэстэтэ аһыллыахтаах.

Федеральнай миниистир Уһук Илини сайыннарыыга анаммыт госбырагыраама бу региоҥҥа олохсуйбут бөрүкүтэ суох быһыыны-майгыны төрдүттэн түөрэн суох оҥоруохтаах.  

"Биллэн турар, бырайыактар олоххо киириилэригэр кырата суох үп-харчы наада. БАМы уонна Транссибы саҥардыыга аннаммыт үбү-харчыны 2015, 2016, 2017 сылларга инвестиционнай бырайыактары олоххо киллэриигэ уонна эрдэлээн сайдар сирдэри үскэтиигэ аныаҕыҥ диэн этиилээхпит. Оттон БАМы уонна Транссибы РЖД уонна национальнай куттал суох буолуутун фондатын суотугар үбүлүөҕүҥ. Итинник буоллаҕына, 2015 сылтан Уһук Илин сайдыытыгар туһаайылылбыт быарйыактары олоххо киллэрии саҕаланыаҕа", - диэтэ Александр Галушка. 

 Владимир Путин ити этиини эбии толкуйдуурга, ааҕарга-суоттуурга сорудахтаата.