Санаабытыгар аҕыйах хонук ханна эрэ барбыт курдук. Уонна үөрэн-көтөн, кэпсээн-ипсээн, репетициятыгар ыксаан театр саалатынан гримеркатыгар бу ааһыах курдук. Хааман истэҕинэ, кини кэнниттэн, хайдах эрэ сырдык суол хаалар курдуга. Ити Айта киһи быһыытынан сырдыгыттан, кэрэтиттэн буоларын, сырдык, ыраас олоҕу олорон ааһарын туоһута буоларын билигин дьэ өйдөөтүбүт.

Айтаҕа айылҕа наһаа улахан талааны биэрбитин, бу кылгас олоҕор, араас үгүс оруоллары оонньоон дьонугар-сэргэтигэр көрдөрөн, көрөөччү биһирэбилин ылан бардаҕа. Биһиги сүһүөхтээх бэйэбит сүгүрүйэн туран махтанабыт төрөппүттэригэр, олус үтүө киһини төрөтөн, иитэн-такайан таһаарбыттарыгар. Махтанабыт кэргэнигэр, Айта талан ылбыт таптыыр идэтигэр үлэлииригэр улахан күүс-көмө, өйөбүл буолбутугар.

Айта үлэтигэр, театрыгар наһаа бэриниилээх киһи этэ. Өйүн-санаатын, туох баар кыаҕын, кыһамньытын ууран, дууһатын биэрэн үлэлиирэ. Ол даҕаны иһин, кини айбыт оруоллара өрүү чаҕылхайдык, хаһан да хатыламматтык тахсаллара.

Айтабыт аатын үйэтитэр сыалтан Сахабыт сирин улуустарыгар ыытыллар оҕолорго аналлаах театральнай фестивальга Айталина Ильина аатын иҥэрдибит. Кэлэр сылга кэриэстэбил уонна ахтыы кинигэтэ тахсыаҕа.

Биһиги сүрэхпитигэр, өйбүтүгэр-санаабытыгар Айтабыт өрүү биһигини кытта баар буолуоҕа. Кини кылгас гынан баран чаҕылхай олоҕо театр баарын тухары уос номоҕо буола туруоҕа.

Саха республикатын Үүнэр көлүөнэтин государственнай театрын коллектива