Ыраах улуустан барыта 80 киһи кэлэн барда. Эбээн норуотун ырыатын, үҥкүүтүн, таҥаһын-сабын, аһын-үөлүн көрдөрөр тэрээһиннэр буоллулар. Араадьыйаҕа, тэлэбиидэнньэҕэ биэриилэр, бырабыыталыстыбаҕа, министиэристибэлэргэ дьыалабыай көрсүһүүлэр, оҕолор уруһуйдарын, маастардар оҥоһуктарын, олохтоох табаары оҥорооччулар быыстапкалара, эбээн таҥаһын көрдөрүү, научнай-практическай конференция, үгүс көрсүһүүлэр буолан аастылар. 

«Бу күннэр түмүктэриттэн астынным, – диэн кэпсээтэ улуус баһылыга Иван Горохов. – Министиэристибэлэргэ сылаастык көрсөн, кыһалҕаларбытын быһаарарга кыһаннылар. Саккырыырга 220 миэстэлээх оскуола, 75 миэстэлээх оҕо саада тутуллар буолла, Сэбээн Күөлүнэн, Батамайынан быһалыы кыһыҥҥы суол аһыллыа, Дьаҕалаахха «Билайн» суотабай сибээс үлэлиэ. Суол-иис министиэристибэтэ вездеход, доруобуйа харыстабылын министиэристибэтэ медицинскэй тэрил биэрэргэ эрэннэрдилэр. Арай балыыһаны тутуу быһаарыллыбакка хаалла. Биһиэхэ көмөлөспүт, кэлэн кыттыбыт дьоҥҥо махтанабын».