Бу туһунан сиһилии телефонунан Машенька ийэтиттэн Инна Александровнаттан ыйыталастым. Алта ыйдаах кырачаанын көрөн олорор ийэ үөрүүтэ муҥура суох.

-- Оҕобут ыт оҕотугар наһаа ымсыырааччы. Уулуссаҕа көрдө да эккирэтэ сатааччы. Ыт оҕолорун таптаан, бүөбэйдээн бөҕө буолааччы. Саҥа дьылга Тымныы Оҕонньортон ыт оҕотун бэлэхтэтиэн туох да наһаа баҕарбыта. “Сурукта суруйуоҕуҥ” диэн биһигини үүйэ-хаайа туппута. Ол иһин, кэргэммин Василий Егоровиһы кытта сүбэлэһэн бараммыт, оҕолор суруктарыгар болҕомто төһө ууруллара буолла диэн дьээбэҕэ, ахсынньы 29 күнүгэр, РФ Президенин Владимир Путин сайтыгар киирэн, сурук суруйбуппут. Оҕобут ыкка ымсыырарын, Саҥа дьылга ыт оҕотун бэлэхтэтиэн баҕарарын туһунан. Итиэннэ испитигэр долгуйа кэтэспиппит. Интернеккэ киирэн көрбүппүт, үс күнүнэн сурукпут киллэриллибит уонна СР Ил Дарханыгар Егор Афанасьевич Борисовка ыытыллыбыт этэ.

Салгыы туох, хайдах буолар эбит диэн сэмээр кэтэһэр курдук буоллубут. Онтубут уонча хоммото, Бүлүү улууһун дьаһалтатыгар ыҥырдылар, ыт оҕото бэлэх туттаралларын туһунан иһитиннэрдилэр. Үөрүү бөҕө буоллубут. Омуна суох түүл дууу, илэ дуу диэх курдук. Кыыспыт адьас үҥкүүлүү, дьиэрэҥкэйдии сылдьар, -- диэн ыал иһирэх ийэтэ СИА корреспонденын кытта үөрүүтүн үллэһиннэ.

Пахомовтар ыттарын оҕотун Чысхаана диэн ааттаатылар. “Сыт, олор” диэн хамаандаҕа номнуо үөрэттилэр. Оҕолоругар бэртээхэй доҕор буолуоҕар эрэнэллэр. Оттон кырачаан Машенька “Тымныы оҕонньор бэлэҕи ыраахтан да ыытар эбит” диэн итэҕэйэр, ытын кытта сасыһа, сырса оонньоон күн солото суох сылдьар.