Маны барытын Бүлүү ГЭС-ны кытары сибээстииллэр. Уу сорох дьыл кытархай дьүһүннэнэн ньамах курдук буолан хаалар эбит. Экологтар кэлэн чинчийэн көрөн баран киһи доруобуйатыгар куттала суох диэн быһаарбыттарыттан сөҕөн олороллор. Онон вице-премьер Петр Алексеев анал лаборатория кэлэн үлэлиэҕэ диэн олохтоохторго эрэннэрдэ.

Маныаха дьүөрэлии кирдээх хаар боппуруоһа Кириэстээххэ, Түбэй-Дьаархаҥҥа, Түбэйгэ турда. Хочуолунайдар убаҕас оттуктан таас чоххо көһүөхтэриттэн, хаардара харааран, тула барыта курунньук. Таһырдьаттан дьиэҕэ киирдэххэ дьиэ муостата харааран хаалар. Мантан ордук хочуолунайтан чугас олорор социальнай эбийиэктэр уонна чааһынай ыаллар эрэйдэнэллэр.

Кыһыҥҥы өттүгэр, техническэй уу суох буолан, олохтоохтор сууналларыгар-тарааналларыгар хаары уулларан туһаналлар. Онон төттөрү убаҕас оттукка көһүөхтэрин баҕараллар. Онуоха, СӨ олоҕун-дьаһаҕын уонна энергетикэтин министирин солбуйааччы Гаврил Левин чугастааҕы кэмҥэ «ОДЬКХ» ГУП хочуолунайдарга ыраастыыр анал оборудованиены туруоруохтааҕын иһитиннэрдэ.