Саха театрыгар тэриллибит форум пленарнай мунньаҕар СӨ Бырабыыталыстабытын бэрэссэдээтэлин солбуйааччы Алексей Дьячковскай чөл олоҕу сырдатыыга судаарыстыбаннай политика үтүө түмүктэрин, чуолаан өлүү ахсаана аҕыйаабытын уонна уһуннук олорооччулар элбээбиттэрин бэлиэтээтэ. «Кырдьаҕас дьон социальнай өттүнэн көмүскэллээх уонна сөптөөх дохуоттаах буолалларыгар үлэлиэхтээхпит. Кинилэр сынньалаҥнарын уонна чэбдигирдэр физкультуранан дьарыктаналларын хааччыйыахтаахпыт, медицинскэй-социальнай реабилитация усулуобуйаларын тэрийиэхтээхпит», – диэн эттэ Алексей Дьячковскай.

Уһун үйэлэнии уопсастыба туругун, социальнай-экономическай усулуобуйатын, олох хаачыстыбатын кэрэһилиир. Саха сирэ 15-с сылын чөл олох доктринатын олоххо киллэрэ сылдьар. Доктрина 2000 с. Саха сирин норуоттарын форумугар ылыллыбыта.

СӨ ыччат дьыалаларыгар уонна дьиэ кэргэн политикатыгар миниистирэ Афанасий Владимиров доктринаҕа 5 сүрүн хайысха: үөрэхтээһин, духуобунас, доруобуйа, айымньылаах үлэ уонна ыраас айылҕа киирэрин тоһоҕолоон бэлиэтээтэ. Бу хайысхалар норуот духуобунай, культурнай, майгы-сигили, историческай уонна уопсастыбаннай нуормаларын харыстабылыгар ананаллар. Онон 15 сыл устата Саха сиригэр атын регионнарга үтүө холобурунан буолар нуорма-быраап базата оҥоһулунна.

Форум бочуоттаах ыалдьытынан РФ Судаарыстыбаннай Думатын депутата Михаил Николаев буолла.

Бу күн медицина аныгы табаардарын уонна технологияларын улахан быыстапкалара тэрилиннэ. Баҕалаах дьон быраастартан наадалаах сүбэлэри-амалары ыллылар.