Тэрээһин бастакы чааһа «Сир Ийэ алгыһынан» диэн тиэмэнэн, Улуу Кыайыы 70, улуус 85, Литература сылын сырдатыынан саҕаланна. Алгысчыт Петр Тихонов үрүҥ акка олорсон олоҥхоттон быһа тардыыны толордо, Ф.К.Попов аатынан Баатара орто оскуолатын кадеттар кылаастарын уолаттара сэрии буойуттарыгар сүгүрүйдүлэр, сахалыы таҥастаах кыргыттар кэнсиэргэ кэлбит ветераннарга сибэкки дьөрбөтүн туттартаатылар.

СР Ил Дарханын дьаһалтатын уонна СР Правительствотын салайааччыта Юрий Куприянов, Ил Түмэн депутаттара Юрий Баишев, Александр Романов, улуус баһылыга Николай Старостин, оройуон Сэбиэтин бэрэссэдээтэлэ Андрей Находкин эҕэрдэ тыл эттилэр.

Культура уонна спорт эстафетатын кыайыылаахтарыгар I бөлөххө инникилээбит Аллараа Бэстээх, Бүтэйдээх, Тараҕай, II бөлөххө I Наахара, Баатара, I Тыыллыма, III бөлөххө Томтор, Мөҥүрүөн уонна Холгума нэһилиэктэрин баһылыктарыгар дипломнары, харчынан сертификаттары уонна эстафета символа бэлиэлээх үрүҥ көмүстэн оҥоһуллубут статуэткалары туттартаатылар.

Бу күн талааннаах саҥа тахсан эрэр сулустар Мэҥэттэн төрүттээх биллиилээх артыыстар Альбина Борисова-Кычкиналыын, Галина Шахурдиналыын, Семен Ченяновтыын, Джида-Saasustar, Күннэйдиин, Виталий Очировтыын, Прокопий Федоровтыын, Сардаана Осиповалыын уо.д.а. көрөөччүлэргэ ырыаларын бэлэхтээтилэр. Ону сэргэ «Кыталык», «Тэтим» үҥкүү коллективтара биэчэри киэргэттилэр, государственнай циркэ акробаттара, ат миинээччилэрэ бэйэлэрин нүөмэрдэринэн сөхтөрдүлэр.

Антракт кэмигэр биир дойдулаахтар ирэ-хоро кэпсэттилэр, оһуокайдаан тэйдилэр, ыллаан-туойан дьиэрэттилэр.