Сүлүөт үлэтигэр Саха Өрөспүүбүлүкэтин Ил Түмэнин депутата Елена Голомарева, аҕыйах ахсааннаах төрүт норуоттар бырааптарын көмүскээччи, Саха Өрөспүүбүлүкэтин баһылыгын бэрэстэбиитэлэ Константин Роббек, юкагирдар ассоциацияларын президенэ Вячеслав Шадрин, тыа хаһаайыстыбатын үлэһиттэрин идэлээх союзтарын бэрэссэдээтэлэ, эбэҥкилэр ассоциацияларын президенэ Борис Николаев, норуоттар дьыалаларыгар департамент салайааччытын бастакы солбуйааччы Лена Иванова уонна да атын уопсастыбаннас бэрэстэбиитэллэрэ кыттыыны ылбыттара мунньах таһымын үрдэттэ уонна бу төрүт хаһаайыстыба сайдыытыгар өрөспүүбүлүкэҕэ болҕомто күүһүрбүтүн туоһутунан буолла.

Сүлүөтү кылгас киирии тылынан оройуон дьаһалтатын баһылыга Александр Иванов арыйда. Оройуоҥҥа дьиэ табатын иитии 2014 сыллааҕы түмүктэрин, таба иитиитин тупсарыыга соруктар тустарынан сүрүн дакылааты тыа хаһаайыстыбатын управлениетын салайааччы Константин Неустроев оҥордо.

Кини төрүт хаһаайыстыбаны салгыы сайыннарыыга ыытыллар тэрээһин үлэлэр сүрүн түмүктэрин уонна хайысхаларын билиһиннэрдэ. Сүрүн ситиһии быһыытынан үлэ куоталаһыытын тэрийэн ыытыыны, табаһыт ыйдааҕы хамнаһын 20,0 тыһ. солкуобайга диэри тиэрдиини бэлиэтээтэ.

Маны тэҥэ табаһыттар үлэлэрин, олохторун чэпчэтиигэ туһуламмыт анал дьаһаллары бэлиэтээтэ. Сүрүн итэҕэһинэн оройуоҥҥа иитиллэн турар дьиэ табатын ахсаана 948 төбөнөн аччатыллыбыта этилиннэ. Бөрөнү утары охсуһуу олохтоох дьаһалталарынан уонна таба иитэр хаһаайыстыбаларынан ситэ тэриллибэтин түмүгэр 862 дьиэ табатын бөрө тардыбыта ыйылынна.

Салгыы «Өлөөн» муниципальнай хаһаайыстыба директора Марина Николаева уонна Дьэлиҥдэ муниципальнай таба иитэр хаһаайыстыба директора Октябрина Иванова таба иитиитин 2014 сыллааҕы түмүктэрин уонна 2015 сылга сүрүн тэрээһин үлэни сиһилии билиһиннэрдилэр.

Хаһаайыстыба үбүн балаһыанньата сыллата тупсан, хамнаска иэс барыта сабыллан, табаһыттарга 20,0 тыһ. солкуобай хамнас төлөнөр усулуобуйата тэриллэн, сыл аҥардааҕы уонна сыллааҕы үлэ түмүгүнэн эбии төлөбүр олохтоноро ситиһиллэн, таба иитиитигэр үлэлиир усулуобуйа тэриллибитин бэлиэтээтэ. Племенной үлэни салгыы тупсаран, зоотехническэй сулууспа үлэтин сөргүтэн, табаҕа электроннай ошейниктары киллэрэн, спутниковай чиптэри дэлэтэн таба ахсаанын элбэтиигэ үлэлэһэллэрин иһитиннэрдэ. Кыыл таба хамсааһынын анал көтөр аппарааттар көмөлөрүнэн кэтээн, билгэлээһини ыытар наадалааҕын туруоруста.

Үбүлүөйдээх сүлүөт бастакы чааһыгар таба хаһаайыстыбатын үлэһиттэрин уонна бэтэрээннэрин наҕараадалааһын буолла.

Күнүстэн киэһэ оройуон дьаһалтатын баһылыгын оробуочай кабинетыгар ыстаада биригэдьиирдэрэ, наставник табаһыттар, таба хаһаайыстыбатын специалистара кыттыылаах 2015 сылга таба иитиитин хаалыыттан таһаарыыга ылыллар дьаһаллар тула киэҥ кэпсэтии буолла. Бу боппуруоска ветуправление начальнига Анджела Николаева, Саха Өрөспүүбүлүкэтин үтүөлээх ветеринарнай бырааһа Василий Христофоров, наставник табаһыт, таба иитэр биригээдэлэр биригэдьиирдэрэ Николай Кириллов, Василий Топоров, Данил Егоров, Христофор Степанов, Дмитрий Андреев, Егор Иванов, «Өлөөн» МУП директора Марина Николаева, «Дьэлиҥдэ» МУП директора Октябрина Иванова уонна да атыттар бэйэлэрин этиилэрин, көрүүлэрин эттилэр, санаа үллэһиннилэр.

Мунньа түмүгүнэн оройуон дьаһалтатын баһылыга Александр Иванов тыа хаһаайыстыбатын управлениетын, таба иитэр хаһаайыстыбалар салайааччыларын иннигэр чопчу соруктары туруорда.

Таба хаһаайыстыбатын үлэһиттэрэ салааны сайыннарыыга туһуламмыт сүрүн боппуруостара оройуон салалтатынан болҕомтоҕо ылыллан, үбүлүөйдээх сүлүөт үлэтин түмүктэриттэн улаханнык астынан тарҕастылар.