«Юкагирдар тустарынан аан дойдуга биллиннэр»

Муус устар 8 күнүгэр Үрүҥ Хайатааҕы гимназияҕа «Ааҕыыга ыҥырыы» диэн регионнааҕы инновационнай бырайыагы сүрэхтээһин буолла. Тэрээһин Литература сылыгар уонна юкагир суруйааччыта, П.А.Ойуунускай аатынан Государственнай бириэмийэ лауреата Семен Курилов үбүлүөйүгэр ананна.

Абый оройуонун баһылыга Михаил Никулин аан тылыгар быйылгы сыл кыра уонна улахан соруктары быһаарыахтааҕын: хас биирдии киһи классическай литератураҕа төннүүтүн, саҥа кинигэни ааҕар буоларын, эдэр ыччат ааҕыынан үлүһүйүүтүн, төрөөбүт литературатыгар тардыһыытын ситиһиэхтээхпитин эттэ. «Духуобунас сыаннастара уонна омук үгэстэрэ — бу төрүт өйдөбүллэр. Куппут-сүрбүт чөл эрэ буоллаҕына салгыы сайдыахпыт, омук быһыытынан уратыбытын сүтэриэхпит суоҕа, төлкөбүтүн түстэһиэхпит», - диэн тоһоҕолоон бэлиэтээтэ.

«Ааҕыыга ыҥырыы» бырайыак, юкагир суруйааччыта Семен Курилов туһунан үөрэх управлениетын салайааччы Прокопий Унаров кэпсээтэ. Биллэрин курдук, Семен Курилов бэйэтигэр псевдоним ылымматаҕа. Аҕыйах ахсааннаах норуот уола буоларын ыйан, оонньуу-күлэ бэйэтин «Юкагир-450» диэн ааттыыра. Кини кылгас олоҕор элбэҕи оҥорон хаалларбыта, ол иһин кэнники кэмҥэ кинини Улуу Юкагир диэн ааттыыр буоллулар.
Гимназия директора Маргарита Ушницкая литература ураты суолтатын туһунан эттэ.

Үөрүүлээх тэрээһин кыттыылаахтарынан гимназия үөрэнээччилэрэ, учууталлара, «Эрэлчээн» үҥкүү ансаамбыла буоллулар.
Икки күн устата учууталлар семинардара, маастар-кылаастар, аһаҕас уруоктар ыытылыннылар. Улуус оскуолаларын театр-студиялара Семен Курилов айымньыларынан туруоруулары көрдөрдүлэр.