Оҕону иитиигэ, улуус уопсастыбаннай олоҕор уһулуччу үтүөлээх, үүнэн иһэр көлүөнэҕэ холобур буолар дьиэ кэргэни бу бэлиэ күнүнэн улуус баһылыга Михаил Никулин, сэлиэнньэ дьаһалтата, үөрэх управлениета, дьиэ кэргэн отдела, орто оскуола коллектива, аймахтара эҕэрдэлээтилэр.

Абыйдааҕы ЗАГС отдела улуус дьоһун ыалын «Бочуот кинигэҕэ» киллэрдэ. Ытыктанар  дьоммутугар «Эрэлчээн» оҕо үҥкүү ансаамбыла, орто оскуола кыргыттара, «Дружба» искусство оскуолатын ырыа ансаамбыла, «Кораблик» оҕо саадын иитиллээччитэ уонна Вера Чиркова ырыаларын, үҥкүүлэрин бэлэхтээтилэр.

Олох араас эндирдэрин ааспыт, билигин оҕолорунан, сиэннэринэн дьоллонон нус-хас олорор дьоһун-мааны дьиэ кэргэн эдэр ыалларга холобур буолар. Бөҕө туруктаах ыал кистэлэҥэ туохханый диэн ыйытыыга тулуурдаах, мындыр буолуу, бэйэ-бэйэни ытыктаһыы, сөҕүрүйбэт истиҥ, сылаас сыһыан, эппиэтинэстээх буолуу дьиэ кэргэни бөҕө туруктуур дииллэр.

Дьоһун-мааны ыал үс уол оҕону төрөтөн, улаатыннаран, олоххо чиҥник үктэннэрдилэр. Олег, Иван үөрэҕи бүтэрэн, идэ ылан баран, иккиэн ыал буолан, иккилии үчүгэйкээн оҕолоохтор. Сиэннэр сорохторо студеннар.

Улахан уоллара Олег Владимирович Дьокуускай куоракка Сайсары уокуругун баһылыга. Кыра уол Иван дойдутугар олорор. Олох биир дэхси буолбат. Гимназия директорынан үлэлии сылдьыбыт орто уолларын Евгенийы соһуччу сүтэриилэрэ кинилэргэ улахан охсуу этэ. Уһуну-киэҥи өйдөөн, тулуйбуттара.

Төһө да сааһырдаллар, Неустроевтар, хотугу дьон сиэринэн, тыаҕа сылдьалларын, балыктыылларын, отоннууларын сөбүлүүллэр. Саас эрдэттэн тыаҕа тахсан олороллор, күһүн хойут бөһүөлэккэ киирэллэр.

Төһөнөн бу Неустроевтар курдук элбэх дьиэ кэргэн иллээхтик, эйэлээхтик, сиэрдээхтик, уопсай сыаллаах-соруктаах олорор да, соччонон биһиги уопсастыбабыт чөл туруктаах буолар.
Улууспут ытык-мааны ыалларыгар Римма Ивановна уонна Владимир Петрович Неустроевтарга баҕарабыт үтүө доруобуйаны, нус-хас, кыһалҕаны билбэт байылыат олоҕу, уһун үйэни.