Үлэ чэрчитинэн республика инвестиционнай кыаҕын туһунан сырдатар презентация, Холбоһуктаах Араб Эмиратын дьыалабыай эргимтэтин кытта көрсүһүү, сөбүлэһиигэ хардарыта илии баттааһын буолара күүтүллэр.

Саха сириттэн үлэлии тиийбит делегация састаабыгар вице-президент Дмитрий Глушко, Тас сибээс уонна федеративнай сыһыан миниистирэ Валерий Максимов, предпринимательство уонна туризм сайдыытын миниистирэ Екатерина Кормилицына, доруобуйа харыстабылын миниистирэ Александр Горохов, Атыы-промышленнай палаата президенэ Владимир Членов, бизнес тэрилтэлэр салайааччылара бааллар.

Муус устар 8-10 күннэригэр Дубай норуоттар икки ардыларынааҕы быыстапка киинигэр инвестиционнай форум (АIM 2014) буолуоҕа.

Холбоһуктаах Араб Эмиратын экономикаҕа министиэристибэтин тэрийиитинэн араб дойдуларыгар бу - биир тутаах суолталаах тэрээһин. Быйыл инвестицияны быһаччы тардыы, киллэрии тула кэпсэтиһии, ырытыһыы буолар. Манна 165 дойдуттан кытталлар. 10 000 дуоһунастаах дьон кэлэрэ күүтүллэр.

Муус устар 8 күнүгэр тэрээһин кыттыылаахтара 2013 сылга инвестицияны быһаччы киллэриигэ анаммыт дакылааты истиэхтэрэ. Ону таһынан инвестицияҕа туһаайыллар сокуон, быраап базата кэпсэтиһиигэ көтөҕүллүө. Быйылгы тэрээһиҥҥэ аан дойдуга албан аатырар тэрилтэлэр салайааччылара, улахан дуоһунастаах дьон миниистирдэр төгүрүк остуолларыгар кыттыахтара.

Ол кэнниттэн икки күн устата тыа хаһаайыстыбатыгар, туризмҥа, аралдьытар индустрияҕа ураты болҕомто ууруллуоҕа. Ону таһынан ЭКСПО-2020 чэрчитинэн үбү-харчыны киллэрии боппуруоһа хабыллыаҕа. Кытай экономикатыгар үбү-харчыны киллэрии туспа тутуллан ырытыллыаҕа. Россияттан бу форумҥа Саха сирин тэҥэ Татарстан,  Чувашия, Омскай уонна Тульскай уобаластартан бэрэстэбиитэллэр кытталлар.