ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт

Тустууга бэриниилээҕин, эппиэтинэстээҕин, ирдэбиллээҕин бэлиэтээтилэр

23 декабря 2015, 22:42
Н.Н.Тарскай аатынан “Туймаада” стадион саалатыгар СР Физическэй культура уонна спорт эйгэтигэр Д.П.Коркин аатынан государственнай бириэмийэтин лауреата, Россия уонна Саха сирин үтүөлээх тренерэ, ССРС спордун маастара Степан Петрович Сивцев 55 сааһын туолбутун үөрүүлээхтик бэлиэтээһин буолла.

photoByWidth&id=52884&width=1000

Бу бэлиэ күҥҥэ Степан Петровиһы Саха Республикатын спорка министрэ Михаил Гуляев, Уус-Алдан улууһун дьаһалтатын баһылыга Алексей Федотов, Үрдүкү спортивнай маастарыстыба оскуолатын дириэктэрэ Александр Игнатьев, Олимпийскай эрэл училищетын дириэктэрэ Алексей Филиппов, Россия үтүөлээх тренерэ Иван Сивцев, аан дойду икки төгүллээх чемпиона Виктор Лебедев уонна элбэх ахсааннаах иитиллээччилэрэ эҕэрдэлээтилэр, бэлэхтэрин туттардылар. Бу дьоро киэһэ Степан Петровичка “Физическэй культура уонна спорт туйгуна” бэлиэ туттарылынна.

С.П.Сивцев спортивнай үлэтин уопутун уонна педагогическай маастарыстыбатын – үрдүк кылаастаах спортсменнары бэлэмнээһиҥҥэ анаата. Кини быһаччы такайыытынан-салайыытынан Россия уонна аан дойду түһүлгэлэригэр республика аатын чиэстээхтик көмүскүүр үрдүк кылаастаах спортсменнар кэккэлэрэ үүнэн таҕыста. Степан Петрович норуоттар икки ардыларынааҕы кылаастаах спорт маастардара: Егор Охлопковы, Иван Паниловы, Афанасий Заболоцкайы, РФ спордун маастардарын Дмитрий Михайловы, Иван Даниловы, Константин Давыдовы, Ивамар Соловьеву, Антон Иванову, Семен Семеновы, Александр Оконешниковы, Дмитрий Шадрины, Михаил Захаровы уо.д.а. дьоһун спортсменнары иитэн таһаарда.

Саха Республикатын спорка министрэ Михаил Дмитриевич Гуляев:

“Степан Петрович, бу сыллар усталарыгар отучча спорт маастарын уонна биэс – норуоттар икки ардыларынааҕы кылаастаах спорт маастардарын иитэн-үөрэтэн таһаарда. Маннык ситиһии, эрчиллии саҥа ньыматын туттан үлэлээһинтэн, саҥа, сонун методиканы киллэрииттэн үөскээн таҕыста диэн сыаналыыбын. Ол түмүгэр республика көҥүл тустуута – Россия элбэх регионнарыгар бастыҥ опыт быһыытынан көрүллэр буолла. Степан Петрович, эйиэхэ кытаанах доруобуйаны, айымньылаах үлэни, дьиэ кэргэҥҥэ туруктаах олоҕу уонна дьолу-соргуну баҕарабын! Саха сирин спорда сайдарын туһугар таһаарыылаах үлэҕин өссө да салгыы тураргар эрэнэбин”.

Россия уонна Саха сирин үтүөлээх тренерэ Иван Николаевич Сивцев:

“Степан Петрович – спортсмен, табаарыс, тренер быһыытынан ылыммыт дьыалатыгар сүрдээх бэриниилээх, эппиэтинэстээх, ирдэбиллээх, үрдүк билиилээх специалист диэн, бу сыллар тухары бииргэ эн-мин дэһэн кэлбит ыкса доҕорбор итинник сыанабылы биэрэбин. Саха сиригэр спорт сайдыытыгар биллэр специалист, тренер быһыытынан үүнэн таҕыста. Улахан спорка кыра оҕолортон саҕалаан, улахан дьоҥҥо тиийэ этап быһыытынан бары түһүмэхтэри барытын ааһан, чахчы бэйэтин билиитинэн-көрүүтүнэн тахсыбыт тренер”.

Уус-Алдан оройуонун баһылыгынан үлэлии сылдьыбыт Афанасий Васильевич Мигалкин:

“Степан Петрович наһаа сэмэй, көнө, тыаһа-ууһа суох баран иһэр уһунньут, көнө сүрүннээх, оҕону, оҕолору ис иһиттэн сырдаан сөбүлүүр киһи. Кини дьоҥҥо үтүөтүк сыһыаннаһарын элбэхтэ түбэһэ көрбүтүм. Тустаах үлэтигэр бэриниилээх, ис-иһиттэн кыдьыгыран туран кыһанар тренер быһыытынан сыаналыыбын. Степан – олоҕу киэҥник көрөр уонна сөптөөхтүк сыаналыыр саха мааныта”.

Р.М.Дмитриев аатынан Олимпийскай эрэл училищетын дириэктэрэ Алексей Алексеевич Филиппов:

“Степан Петрович сүрдээх түбүктээх, саҕалаабыт дьыалатын тиһэҕэр тиэрдэн эрэ баран тэйэр, туруорсуулаах, ирдэбиллээх киһи. Биир тылынан, дьыала туһугар ыалдьар, үлэҕэ бэриниилээх киһи кини баар. Сынньалаҥ – суох, бииртэн биир сбор, күрэхтэһии тиһигин быспакка кэлэ турар. Киниэхэ уоппуска диэн суоҕун да кэриэтэ. Кэргэнэ Алла Капитоновна тыаһа-ууһа суох сылдьан тустаах үлэтин бүтэрбитэ-оһорбута эрэ баар буолааччы. Эмиэ олоҕун аргыһын курдук, үлэҕэ олус эппиэтинэстээх. Сивцевтэр дьиэ кэргэҥҥэ уйгу-быйаҥ олоҕу, уруулара, аймахтара кэҥии турарыгар баҕарабын!”

Үрдүкү спортивнай маастарыстыба оскуолатын дириэктэрэ Александр Афанасьевич Игнатьев:

“Степан Петрович учууталын, тренерин, наставнигын – Дмитрий Петрович Коркины утумнаан күн бүгүн тренер быһыытынан ситиһиилээхтик үлэлии-хамныы сылдьар. Ити этиллибити туоһулаан, кини иитиллээччилэрэ кыра саастаахтарга, онтон эдэрдэргэ, салгыы улахан дьоҥҥо ананан үлэлиэҕиттэн, үрдүк спортивнай көрдөрүүлэри ситиспиттэрэ. Спорт үтүөлээх маастара Виктор Лебедев Москва куоракка ыытыллыбыт аан дойду чемпионатын кыайыылааҕынан буолан, тренерэ Степан Петровичка дьоһун бэлэҕи оҥорбута. Ити кэнниттэн Семен Семенов уонна Айаал Лазарев Азия континенын үрүҥ көмүс уонна боруонас мэтээллэрин аҕалбыттара. Бу кыайыылар биһигини – спорт үлэһиттэрин уонна тустууну таптааччылары элбэххэ эрэннэрэр”.

Степан Петровиһы 55 сааһын туолбутунан ис сүрэхтэн истиҥник эҕэрдэлиибит! Чэгиэн-чэбдик доруобуйаны, дьолу-соргуну, байылыат олоҕу уонна айымньылаах үлэни баҕарабыт. Оҕолорун уонна сиэннэрин дьоллорунан өрүү үөрэ-көтө, айа-тута сылдьар алгыыбыт!

 photoByWidth&id=52885&width=1000Спорт министрэ М.Д.Гуляев - Степан Петровичка "СР физическэй культураҕа уонна спорка туйгуна" бэлиэни тэҥэ байанайы баҕаран бэлэҕин туттара.

photoByWidth&id=52886&width=1000Россия үтүөлээх тренерэ И.Н.Сивцев уонна спорт маастара Яков Заровняев эҕэрдэлэрэ.

photoByWidth&id=52887&width=1000Үрдүкү спортивнай маастарыстыба оскуолатын салалтата бэйэтин Степан Петровичка бэйэтин эҕэрдэтин тиэрдэр.

photoByWidth&id=52888&width=1000Аан дойду икки төгүллээх чемпиона Виктор Лебедев бэйэтин бэлэҕин туттарар.

photoByWidth&id=52889&width=1000СР үтүөлээх тренерэ Н.Н.Рожин иитиллээччитэ, билигин тренеринэн үлэлиир Артур Федоровтыын сүбэлэһэллэрэ элбэх.

photoByWidth&id=52890&width=1000Доҕордуулар көрсүһүүлэрэ. Маннык көрсүһэр түгэн күн аайы буолбат.

photoByWidth&id=52891&width=1000Таарыччы мин оҕо сылдьан эрчиллибит тренердэрбинээн Н.Н.Рожинныын, Н.Р.Крыловтыын өйдөбүнньүк хаартыскаҕа киирдим.

photoByWidth&id=52892&width=1000Биэчэри тустууктар доҕордоро, Лэгэнтэй киэргэттэ.

photoByWidth&id=52893&width=1000Дьоро киэһэ түмүктэниитэ. Бу хаартыска аата "Саамай тулуурдаахтар уонна бэриниилээхтэр".

Просмотров: 155 Комментариев: 0 Автор: Петр Павлов
Стиль и орфография автора сохранены.
Мнение автора может не совпадать с мнением редакции.

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ