Тутууну иһиттэн киирэн көрүү-истии түмүгэр, бу дьиэлэр чахчы да, «баһаалыста, кэлиҥ, олоруҥ уонна үлэлээҥ» диэн тыа сирин ыччатыгар анаан усулуобуйа тэриллибитэ хайҕаныан уонна холобур эрэ буолуон сөп.

«Кофе иһэн баран хотоҥҥо тахсыахтара», -​ диэн Кузьма Пермяков өрө көтөҕүллэн туран кэпсиир. Буолумуна, маннык толору хааччыллыылаах дьиэлэринэн үлэһит дьону хааччыйар ыччакка анаммыт анал бырайыак республикаҕа суох. Агрокластер диэн эти, үүтү оҥорон таһаарар сыах. Бу сыахха үлэлиир ыччаты өйүүр сыалтан, нэһилиэк федеральнай программаҕа киирэн «Чараҥ» диэн 24 дьиэлээх кыра оройуону тутан саҕалаабыт. Быйыл күһүн 12 дьиэ үлэҕэ киириэхтээх.

Манна кимнээх олороллор диэн ыйытыыбытыгар, «Бу дьиэлэргэ хотоҥҥо үлэлиир эдэр ыаллар олороруохтара», - диэн кэпсээтэ. Бырайыак сүрүн соруга – эдэр ыал 25 ынах сүөһүнү ылан, хотон туттан иитиэхтээх. Биэс сыл устата үлэлээтэхтэринэ, бу дьиэ бэйэлэригэр хаалар. Саамай киһи хайҕыыра уонна ымсыырара – дьиэ толору хааччыллыылаах. Оннооҕор «Ыраас уу» диэн сир анныттан иһэр уу кытта быһалыы кэлиэхтээх. Онон аныгы ыччат хотоҥҥо тахсыан иннинэ оһох оттубакка, итии кофе иһиэҕэ, сылаас ууга суунуоҕа.

Дьиэлэр бары душтаныахтара, туалеттаныахтара. «Чараҥ» оройуон барыта асфальтынан бүрүллэрэ былааннанар. Киин хочуолунайтан оттуктаах, барыта туспа уот ситимнээх, саҥа оҕо садтаах, туспа оскуолалаах, быһата, сайдар кэскиллээх. Оттон бары билэрбит курдук, тыа сиригэр саамай ыарахан – уу  кырыымчыга, күн аайы суунар-тараанар усулуобуйа, сылаас туалет суоҕа уонна оһох оттуута. Мугудай агрокластерыгар үлэлии кэлэр эдэр ыал «Чараҥ» оройуоҥҥа олохсуйалларыгар бары усулуобуйаны тэрийэргэ дьулуһар дьаһаллаах салайааччы Кузьма Иннокентьевич: «Өссө даҕаны 12 дьиэ баар, биһиэхэ үлэлии кэлиҥ, кэмсиниэххит суоҕа», - диэн ыҥырда.

Оттон бу дьиэлэри Дьокуускайтан «Диамантер» диэн тутуу тэрилтэтэ тендергэ кыайан тута сылдьар. ​"Тыа хаһаайыстыбатын министерствотын программатынан тендергэ кыайан 13 үлэһиттээх дьиэ тута тахсыбыппыт. Дьиэ иэнэ 72.кв.м. Дьиэлэр тутуллар матырыйаалларын барытын куораттан тиэйэн аҕалбыппыт. Дьиэлэр сыбаайаларын олохтоохтор эрдэ бэлэмнээбит этилэр. Онон икки өттүттэн өйөһөн, киэҥ далааһыннаахтык үлэлии сылдьабыт", - диэн тэрилтэ үлэһитэ, тутууга директоры солбуйааччы Иван Прохоров кэпсээтэ.

Нэһилиэк баһылыга: «Бу Айсен Егоров диэн күтүөт баар, саҥа дьиэҕэ киириэхтээх, киниэхэ тылла биэриэҕиҥ», - диэн этии көтөхтө. Бэрт сэргэх сирэйдээх-харахтаах эдэр киһи тахсан бэйэтин билиһиннэрдэ: "Мин Чурапчыга күтүөппүн. Бэйэм Уус-Алдантан төрүттээхпин. Мугудайга бу күһүн көһөн тахсыбыппыт. Бэйэм тыа хаһаайыстыбатын академиятын бүтэрбитим. Бу күһүн дьиэбитигэр киириэхпит диэн үөрэ сылдьабыт.1,5 мөл. суумалаах граҥҥа тиксэн, 25 төбө сүөһүнү атыыласпытым. Саҥа каркаас хотон тутта сылдьабыт. Быйыл 25 сүөһүнү иитэргэ былаан туруоруммуппут. Саҥа сиргэ саҥа олоҕу тутарга бэлэммит!".

Айсен тыл этэн бүтээттин кытта ыччат министрин бастакы солбуйааччы Гавриил Семенов, куруук буоларын курдук бэрт аһаҕастык, сэргэхтик:​ "Хорсун уонна дьиҥ патриот ыччат улууска тахсан үлэлиир! Ыччат тыа сиригэр тахсан үлэлиирин биһириибин. Айсен Егоров курдук күтүөттэр элбээтиннэр!", - диэн уоттаах-күөстээх тылы эттэ.