«Тыа хаһаайыстыбатын министиэристибэтэ олохтоох бородууксуйаны оҥорон таһаарыыны улаатыннарар соругу күүскэ туруорда», - диэтэ ас ырыынагар суһаалык дьайар штаб мунньаҕар миниистири солбуйааччы Сталик Дерягин. 

Эт бородууксуйаны улаатыннарар сорук турар. Онон, сүөһү эбии аһылыгын хааччыйыы, тыа хаһаайыстыбатын бородууксуйатын харайар эбийиэктэри тутуу, о.д.а. миэрэлэр ылыллаллар. Нерюнгритааҕы көтөр фабриката көтөр этин оҥорон таһаарыыны икки бүк улаатыннарыахтаах. Көрдөрүүнү 3,5-тэн 6,3 тыһ. тоннаҕа диэри улаатыннарыахтаахтар. Хатастааҕы сибиинньэ комплексын саҥардыы, сибиинньэ этин 2,5 тыһ. тоннаҕа диэри оҥорон таһаарыы соруктара тураллар. Бу тэрээһиннэр 2017 сылга диэри ыытыллыахтара.

С.Дерягин эппитинэн, олохтоох бородууксуйаны оҥорон таһаарыы былаана эккэ наадыйыыны тилэри хааччыйбат.  «Оҕуруот аһа, хортуоппуй наадыйыы 95% сабар, оттон, үүт уонна үүт аһылык 85-90%», - диэтэ кини. 

Тыа хаһаайыстыбатын уонна ас-үөл политикатын министиэристибэтэ Росельхознадзор управлениетын даннайын аҕалла. Ол курдук, 2013 сылга өрөспүүбүлүкэҕэ 30,150 тыһ. тонна эти аҕалбыттар, ол иһигэр 14,630 тыһ. тонна Россия регионнарыттан, онтон атына омук дойдуларыттан аҕалыллыбыт. Ынах этигэр көрдөрүү маннык: Аргентинаттан - 371 тонна, Бразилияттан 1 087 - тонна, Парагвайтан — 3 094 тонна, Уругвайтан — 571 тонна, Белоруссияттан 2 021 тонна. Сибиинньэ этигэр: Бельгияттан — 1 833 тонна, Бразилияттан - 1 324 тонна, Канадаттан - 1 484 тонна, Испанияттан - 2 245 тонна, Данияттан - 1 764 тонна, Германияттан - 1 587 тонна. Көтөр этигэр: Нидерландыттан — 418 тонна, АХШ-тан (куурусса буута) — 4 003 тонна, Украинаттан - 533 тонна. 

2014 сыл 7 ыйын түмүгүнэн 23 тыһ. тонна эт уонна эттэн бородууксуйаны аҕалбыттар, итинтэн импорт - 15 100, Россияҕа оҥоһуллубута - 7 900 тонна.