Вилена Федора уонна Владислав Аммосовтар дьиэ кэргэттэригэр күүтүүлээх бастакы оҕонон күн сирин көрбүтэ. Эдэр ыал төрөөбүт-үөскээбит, оонньоон-күөлэhийэн улааппыт улуу Бүлүү уонна Өлүөнэ эбэлэрин уруйдаан, кыыстарын Вилена диэн сүрэхтээбиттэрэ.

Эдэр дьон олоҕу көрүүлэрэ кэскиллээх, сайдам айылгылаах буолан, Виленаны кыратыттан ырыаҕа сыhыаран, үҥкүүгэ уhуйан, толлубакка кыттан иhэргэ, кыайыыга дьулуурдаах буоларга ииппиттэрэ.

Төрөөбүт нэhилиэгин, улууhун тэрээhиннэригэр ситиhиилээхтик кыттан, онтон кынаттанан, кырачаан Вилена сатабыла өссө сайдан, дьаныардаахтык дьарыктанан барбыта саарбаҕа суох. Ол курдук, улууска ыытыллар «Күн бытархайа» ырыа-үҥкүү күрэҕэр үһүс миэстэни ылан бастакы ситиhиитин бэлиэтээбитэ.

Онтон саҕалаан Вилена араас таhымнаах тэрээhиннэргэ үөрэ-көтө кыттан иhэр. Мэлдьи аламаҕай, элэккэй-эйэҕэс майгылаах буолан, дьону бэйэтигэр тардар күүстээх, дьон сүрэҕин абылыыр кыахтаах. Эрчимнээх музыка тэтимигэр сөп тубэhэн, сыанаҕа тахсан үҥкүүлээн тэлээрдэҕинэ, хайа да көрөөччү сүрэҕэ сылаанньыйар, уҕараабат ытыс тыаhын бэлэх уунан атаарар.

Быйыл Өктөмҥө ыытыллыбыт улуустааҕы «Мини-мисс Хаҥалас – 2014» күрэскэ «Мисс талант» анал аат кыайыылааҕынан буолбута. Чкалов нэhилиэгин ыhыаҕар «Сайыына Куоҕа» эрэллээхтик бастаабыта. «Маленькая красавица Якутии–2014» күрэскэ ситиhиилээхтик кыттан, II вице-мисс бастыҥатын кэппитэ.

Уонна бу ахсынньы 13 күнүгэр дойдубут тэбэр сүрэҕэр Москва куоракка «Маленькая красавица России» күрэскэ баар сатабылын, талаанын барытын көрдөрөн, дьүүллүүр сүбэ, үгүс көрөөччу биhирэбилин ылан, «Мисс совершество» анал аат хаhаайкатынан буолла, үрдүк иккис миэстэҕэ таҕыста. Ону сэргэ театр уонна киинэ артыыhа Анна Автушенко анал бирииhин, ыҥырыытын тутан, өрөгөйө өссө үрдээтэ.

Кинини кытта эдьиийин курдук саныыр биир дойдулааҕа, Хаҥалас Улахан Ааныттан Айыына Пудова эмиэ Москваҕа ыытыллыбыт «Юная звезда России» күрэскэ Гран-при хаһаайката буолан, кыайыы өрөгөйүн биллэ.