Андрей Борисов «Илиир хоруолу» уон аҕыс сыл анараа өттүгэр, 1997 сыллаахха, туруорбута. Испэктээкил 1998 сыллаахха Санкт-Петербурга «Балтийский дом» фестивальга ситиһиилээхтик кыттан театр сүгүрүйээччилэрин, үөрэхтээхтэрин, Россия театрын эйгэтин улаханнык сөхтөрбүтэ. Бу испэктээкилинэн Андрей Борисов Россияҕа Евразия театра инники күөҥҥэ таҕыста уонна инникитин сайдар кэскиллээх диэн иитийэхтээн таһаарбыт күүстээх санаатын иһитиннэрбитэ уонна бу испэктээкилинэн дакаастаабыта. Онон «Илиир хоруол» испэктээкил илин, арҕаа дойдулар култуураларыгар олоҕурар театрдар хардарыта байытыһар хайысхаларын тутуһар Евразия театрын бастыҥ холобурунан буолбута.

Тоҕо бу испэктээкил Саха театрын сценатыгар төннүөхтээҕин туһунан Андрей Саввич бу курдук этэр: «Шекспир айымньытынан уһулуччулаах испэктээкил эстетикатыгар эдэр артыыстары үөрэтиэххэ наада диэн сүрүн санаам. Ол аата эдэрдэр дьиҥнээх идэтийии оскуолатын барыахтаахтар. Билигин оонньуур артыыстар бары Ефим Николаевичтыын бэйэбит үөрэппит оҕолорбут. Иккис курдук сүүрбэччэ сыл ааспытын кэннэ испэктээкил темата билигин даҕаны актуальнайын көрдөрүөхпүн баҕарабын. Цивилизация, дойдулар, итэҕэллэр, дьон өйө-санаата билигин да айдаан арыаллаах. Геннадий Сотников худуоһунньук быһыытынан быдан инникини өтө көрбүт эбит диэн сөҕөбүн. Саха театра Шекспир айымньытын сэттис төгүл туруорар. Арҕаа дойду драматурун айымньыта тоҕо эрэ биһиэхэ, саха кутугар-сүрүгэр сөп түбэһэр, табыллар. Ону көрөөччү ылынарыттан эмиэ көрүөххэ сөп.Билигин, сүүрбэ биирис үйэҕэ, саҥа Саха сирин остуоруйатын саҕалыыбыт. Саха театрын уус-уран салайааччыта буоларым быһыытынан саҥа кэми театр эйгэтигэр саҥа программанан саҕалыыр сыал-сорук турар. Ити программабын мин «Илиир хоруол» испэктээкилинэн саҕалыыбын».

Биллэн турар, режиссер этиитин кэнниттэн испэктээкилгэ эдэр артыыстар оонньууларын эрэ буолбакка, көрөөччү испэктээкили билиҥҥи кэм театр сценатыттан күлүгүрэн көстөрүн курдук сыаналыа. Илиир хоруол оруолун толорооччу артыыс Ефим Степанов санныгар эмиэ чэпчэкитэ суох уустук олох сүктэриллэр. Ити айар уонна оонньуур уобараһыгар туһаайан холооһун курдук эрээри, ити санааҕа талааннаах артыыска бүтүн эдэр көлүөнэ артыыстарын таһымнарын өрө анньан таһаарар сүдү сорук эмиэ сүктэриллэрэ этиллэр.