Сүүһүгэр «педофил» диэн суруллубута хааннырбыт, ким эрэ хам баттаан олорор илиитэ көстөр. Бу хаартысканы көрбүт киһи кимнээх эрэ педофилы тутан, бэйэлэрэ дьүүллээбиттэр диэн быһаарыан сөп. Хаартыска сонун курдук Интернеккэ «ыйаммытыгар», дьон үксэ да (сэрэйдэххэ, эдэрдэр) оннук санаабыта.

Оттон өрүкүйбэккэ, өйү-төйү сааһыланан болҕойдоххо, икки сиэрдээх ыйытыы үөскээн тахсар: бастакытынан, бу киһи чахчы буруйдааҕа биллэн, маннык кэбилээбиттэр дуо диэн (суут күүһүгэр киирбит бириигэбэринэн эрэ киһини «буруйдаах» дэнэр), оннук буоллаҕына бу киһи тоҕо хаайылла илигий диэн; иккиһинэн, бу киһи оҕону күүһүлээһиҥҥэ буруйа суох буоллаҕына, атаҕастаабыт дьон бэйэтэ эппиэккэ тардыллыан сөп диэн. Киһини кырбыахтара ини, сүүһүгэр «педофил» диэн быһа сотон суруйуохтара ини, өссө бар дьон көрүүтүгэр диэн хаартыскаҕа түһэрэн, саакка-суукка киллэрээри, «ватсабынан» ыытыахтара ини.

Биллэн турар, быраабы араҥаччылыыр уорганнар ити хаартысканы болҕомтоҕо ылан, хантанын-туохтанын бэрэбиэркэлээбиттэр. Ол түмүгэр, полиция үлэһиттэрэ хаартыскаҕа түһэриллибит киһи Булуҥтан төрүттээҕин, урут сууттана сылдьыбытын, 31 саастааҕын быһаарбыттар. Ону тэҥэ, бу киһи былырыын бииргэ арыгылаабыт аймаҕын массыынатын күрэппитэ биллибит. Үс күнүнэн алдьаммыт массыынаны штрафстоянкаттан булбуттар. Буруйдаах киһи оҥорбут хоромньутун төлүөх буолан эрэннэрэн баран, куота-саһа сылдьыбыт.

Дьэ, уонна бу бэс ыйын 3 күнүгэр аймахтыылар маҕаһыыҥҥа көрсө түспүттэр. Массыыналаах аймах харчытын ирдэһэн, билэр киһитин кытта бу сордооҕу куорат таһыгар таһааран кырбаабыттар. Онно эбиитин кинини киһи быһыытынан түһэрэр сыалтан сыгынньахтаабыттар, этибиэркэнэн сүүһүн «педофил» диэн суруйан хайа соппуттар, хаартыскаҕа түһэрбиттэр уонна «ватсабка» ыыппыттар. Онно РФ ИДьМ-тын СР ИДьМ-тын пресс-сулууспата «бу чахчынан холуобунай дьыала тэриллиэн сөп» диэн иһитиннэрбитэ.

Ол эрэн, билигин иһитиннэрбиттэринэн, дьыала тэриллибэтэх. Аймахтыылар бэйэ-бэйэлэрин өйдөспүттэр. Былырыын массыынаны «уларсыбытын» иһин биирэ үҥсүбэтэх, быйыл иккиһэ итинник кэһэйэн баран, полицияҕа сайабылыанньа биэрбэтэх.

Бу түбэлтэ эдэрдэргэ үөрэх буолуон сөп. Киһи туох эмит буруйдаах да буоллаҕына, бэйэ сууттаабакка, сокуонунан киирсэр ордук. Ити киһини кырбаабыт, сааттаахтык түһэрбит уолаттар аймах буолбатахтара эбитэ буоллар, дьыалаҕа эриллиэхтэрэ, сокуонунан эппиэттиэхтэрэ хааллаҕа.