Ил Түмэн пресс-сулууспата СИА-ҕа иһитиннэрбитинэн, көрсүһүүгэ кэпсэтии Ньурба улууһун Чаппанда нэһилиэгин инники сайдыытыгар ыытыллар үлэ тула барда. Ил Түмэн сир сыһыаннаһыыларыгар, айылҕа баайыгар уонна экологияҕа сис кэмитиэтин председателэ Владимир Прокопьев кэпсэтиини саҕалыырыгар депутат Антонина Григорьева Ньурбаттан  төрүттээх Ил Түмэн депутаттара биир дойдулаахтарын кытта көрсөр үтүө үгэстэрин саҕалаабыта үчүгэйин, инникитин улуус уонна нэһилиэктэр сайдыыларын туһугар бу курдук бииргэ алтыһан үлэлиир ордук көдьүүстээх буолуон сөбүн бэлиэтээтэ.

 

Антонина Григорьева Чаппанда уонна Антоновка нэһилиэктэриттэн төрүт-уус тардар республика бөдөҥ салайааччыта Александра Овчинникова төрөөбүьэ быйыл 100 сыла туоларынан сибээстээн, манна аналлаах тэрээһиннэргэ Чаппанда олохтоохторо көхтөөхтүк кыттыахтаахтарын бэлиэтээтэ. Кэлбит ыалдьыттар онно бэлэмнэнии чэрчитинэн Чаппандаҕа кини аатынан оҕо саадын өрөмүөнүгэр итиэннэ сылааһынан хааччыйыыга 700 тыһыынча көрүллүбүтүн, ол эрээри ити үп кырыымчыгын, эбии үбүлээһин эрэйиллэрин ыйдылар. Маны сэргэ нэһилиэк актыбыыстара ааспыт сылга Чаппанда нэһилиэгэ кэккэ ситиһиилэрдээх түмүктээбитин бэлиэтээн туран, оскуола тутуллуутун былааҥҥа киллэртэриини уонна спортивнай сааланы тутууну күүскэ туруорсар наадатын туһунан кэпсэттилэр.

 

Дьокуускай куоракка Ньурбаттан төрүттээх биир дойдулаахтары түмэр “Ньурбакаан” общественнай түмсүү салайааччыта Алевтина Николаева депутат Антонина Григорьева Ил Түмэн наукаҕа, үөрэхтээһиҥҥэ, культураҕа, сонуннары киэҥник тарҕатар средстволарга уонна общественнай тэрилтэлэрин кытта үлэҕэ сис кэмитиэти салайар үлэҕэ анаммытынан эҕэрдэлээн туран, кини “Ньурбакаан” түмсүүнү тэрийээччи буоларынан биир дойдулаахтара ыытар үлэлэригэр өйөбүл-тирэх буоларын бэлиэтээтэ. Итини сэргэ улуус аҕа саастаах көлүөнэтин үлэтин-хамнаһын, сэрии кыттыылаахтарын  тустарынан киинэ оҥоһулла сылдьар. 2009 сылтан ыла “Ньурбакаан “ хаһыат тахсар. Көрсүһүүгэ хаһыаты улуус хаһыатыгар сыһыарыы быһыытынан кварталга биирдэ тарҕатар туһунан боппуруос көтөҕүлүннэ.

 

Түмсүү көхтөөх чилиэнэ, педагогическай үлэ ветерана, ветераннар хордарын салайааччыта Екатерина Григорьева общественнай тэрилтэ быйыл 10 сыла туоларынан сибээстээн, Ньурба улууһугар киэҥ культурнай программалаах барыы былааннанарын, онуоха транспорт өттүнэн норуот депутаттара көмөлөһөллөрө эрэйиллэрин, түмсүү республика, киин куорат уонна улуус таһымнаах араас өрүттээх культурнай-сырдатар тэрээһиннэргэ көхтөөхтүк кыттарын туһунан кэпсээтэ.

 

Депутаттар инникитин олохтоохтор накаастарын толорууга түмсүүлээхтик үлэлиир былааннаахтарын этэн туран, Владимир Прокопьев спорт саалатын тутуута улуус былааныгар баарын, оҕо саадын тутууну “Үтүө дьыала” былааныгар киллэртэриигэ норуот депутаттарын өттүттэн үлэ барыаҕын, Үөрэх министерствотын программатыгар Ньурба  улууһуттан 4 оскуола хаарбах оскуолалар ахсааннарыгар киирэ сылдьарынан, ол иһигэр Чаппанда оскуолатын тутуута көрүллэрин тустарынан иһитиннэрдэ. 

 

Норуот депутаттара Чаппанда нэһилиэгиттэн кэлбит “Алгыма” общественнай тэрилтэ актыыбынай чилиэннэригэр республика, улуус уонна нэһилиэк социальнай-экономическай олоҕор тус үлэлэринэн киллэрбит кылааттарын иһин Ил Түмэн сис кэмитиэттэрин Бочуоттаах грамоталарын туттартаатылар. Ол курдук Музыка оскуолатыгар 30 сыл эҥкилэ суох үлэтин, нэһилиэк, улуус олоҕор актыыбынай кыттыытын иһин Нина Алексеевна Егорова, оҕо саадын үлэһиттэрэ Клавдия Егоровна Иванова, Елизавета Николаевна Егорова уонна да атыттар сис кэмитиэттэр Бочуоттаах грамоталарын туттулар. Ньурба улууһун Чаппанда нэһилиэгин олохтоохторо република Ил Түмэнигэр сылдьан баран, салгыы киин куорат бэлиэ миэстэлэринэн сылдьар былааннаахтар.