Россия 13 кыһыл көмүс мэтээллэммититтэн (Олимпиада тухары 98 комплект оонньонно) үһүн Виктор аҕалла. Арай, Виктор Россияҕа көһөн кэлбэтэх буоллун? Хайдах буолуох этибитий?
Бэйэбитин спортивнай держава быһыытынан билинэбит. Виктор кыайыытыттан бары үөрэбит. Ол эрэн, толкуйдаан көрдөххө, легионер кыайыыта биһиэхэ — үөрэргэ төрүөт дуу, хомойорго дуу? Олимпийскай хамаанданы сүүмэрдээһиҥҥэ, дьарыктааһыҥҥа үп бөҕө кутуллар. Канада Ванкуверыгар сааттаах хотторуу кэнниттэн, Медведев (оччолорго президент этэ) дойду олимпийскай комитетын «түүтүн үргээбитэ». Бронзовай бонзаҕа кубулуйан эрэр бэрэссэдээтэл Леонид Тягачев дуоһунаһыттан уһуллубута. Вице-премьердии олорор Александр Жуков анаммыта. Мин көрүүбэр, Ванкувер "таһыыра" син туһалаабыт эбит. «Хедхантерскай» (үчүгэй дьону көрдөөһүн) үлэни ыытан, атын сиртэн спортсменнары көрдөөн бардахпыт.
Шорт-трек (кылгас дистанцияҕа куоталаһыы) - россиялар сааспытыгар бастаабатах көрүҥмүт. Онон, Аны аҕалыы сөптөөх быһаарыныы курдук.
Нуучча улуу императрицата Екатерина II «кыайыылаахтары сууттаабаттар» диэн этэн турардаах. Хайдах да буоллун, биһиги кыайдыбыт! Ан буоллун, Уайлд буоллун — биһиги кыайдыбыт!
Рекламаҕа уһуллар аутсайдердар
Россия улуу кыайыытын кэннэ, «мешоктаммыт» Овечкин салгыы Gillette бириитибэнэн бытыгын хоруна, оттон Плющенко «чупа-чупсун» эмэ барыахтарын сөп, – диэн, биир эмэ үөннээх киһи, кыһыйбыт-абарбыт санаатыгар, итинник этиэн сөп балаһыанньата үөскээтэ. Дьарыктаныах оннугар харчы өлөрө, араас табаары рекламалыы сылдьыбыт курдуктар.
Аныгыс олимпиада
Аныгыс Олимпиада Виктор Ан дойдутугар — Соҕуруу Кореяҕа буолар үһү. Дьоно бырастыы гыннаран төттөрү ылаллара дуу? Биитэр, кытаанах майгылаах кэриэйдэр «барбытыҥ да, сырыт» дииллэрэ дуу? Онон, Ан боппуруоһун аана билигин да аһаҕас хаалар...
Чөмпүйүөннэр бириэмийэлэрэ
Дмитрий Медведев спорт министрэ Муткоҕа «Викторга Москваҕа үчүгэй квартирата булан биэриҥ» диэн дьаһайда. Викторы аныгыскы Олимпиадаҕа диэри тутаары. Онтуҥ сыаната бэйэтэ сүүрбэччэ мөлүйүөн. Дмитрий Медведев өссө хас да сыллааҕыта олимпийскай призердар бириэмийэлэнэр балаһыанньаларын бигэргэтэн турар. Онно этиллэринэн, бастаабыт киһи 4 мөл. солк. тиксэр. Үстэ бастаабыт Виктор 12 мөл солк. ылыахтаах. Ол эрэн, хамаандата бастаан үөрбүт-көппүт Путин бириэмийэ кээмэйин улаатыннаран да кэбистэҕинэ боруок суох буолара буолуо.
Эһэ ытаата эрээри, көппөтө
Сочитааҕы Олимпиаданы 1980 сыллааҕы Москватааҕы Олимпиаданы кытта тэҥнииллэр. Салгыҥҥа көппүт, дьон бөҕөнү ытаппыт олимпийскай эһэ миискэ уобараһа бу оонньуулар сабыллыыларыгар эмиэ хатыланна. Сочитааҕы персонаж — үрүҥ эһэ. Кини, 34 сыл аннараа өттүнээҕи «коллегатын» курдук, Олимпиада сабыллыытыгар ытаан дьону-сэргэни долгутта. Хаҥас иэдэһинэн хараҕын уутун таммаҕа аллараа сүүрдэ...
Арай, салгыҥҥа көппөтө...
Комментарии
Авторизация на сайте через социальные сети