Номнуо 20 сыл В.А.Босиков аатынан СР Музыка Үрдүкү оскуолата – инновационнай үөрэтэр тэрилтэ, манна музыкальнай уонна уопсай үөрэхтээһин оскуолата, училищета уонна үрдүк үөрэх кыһата бааллар. Үөрэнээччилэр Россия уонна тас дойду музыкальнай конкурстарын кыайыылаахтарынан уонна призердарынан буолаллар, онон Саха сирин имиджин үрдэтэллэр.
Музыка Үрдүкү оскуолата 1993 сыллаахха Саха сирин президенин Михаил Николаев уурааҕынан тэриллибитэ, оттон президент Егор Борисов уурааҕынан оскуолаҕа үөрэх кыһатын бастакы ректора, РФ уонна СР культуратын үтүөлээх үлэһитэ Василий Афанасьевич Босиков аата иҥэриллибитэ.
Оскуоланы төрүттээччи, республика бастакы президенэ, РФ Государственнай Думатын депутата Михаил Николаев музыканы үөрэтии республикаҕа дириҥ силистээҕин бэлиэтээтэ: «Саха сиригэр бастакы музыкальнай оскуола өссө ыраах 1943 сыллаахха аһыллыбыта». Итини таһынан Михаил Ефимович музыка улаатан эрэр көлүөнэни иитиигэ улахан оруоллааҕын эттэ.
Ил Түмэн Государственнай Мунньах аатыттан үөрэнээччилэри, уһуйааччылары, үөрүүлээх киэһэ бары кыттыылаахтарын бу кэрэ-бэлиэ түгэнинэн парламент бэрэссэдээтэлэ Александр Жирков эҕэрдэлээтэ.
«Бүгүн музыка Үрдүкү оскуолатын төрүттээччи Михаил Ефимович Николаев чопчу эппитин курдук, музыка – бу биһиги норуоппут хаанынан бэриллибит ураты өйдөбүлэ, - диэн бэлиэтээтэ Александр Жирков. - Биһиги норуоппут төрүөҕүттэн музыкальнай, ону биһиги былыргы, өйбүт-санаабыт нэһилиэстэбэтиттэн бигэргэтэбит. Биһиги өбүгэлэрбит Куйаар тыаһын сатаан истэллэрэ уонна дорҕоон музыкалаах диэн итэҕэйэллэрэ. Кинилэр куйаар хас да дорҕоонун дэгэтин арааран истэллэрэ. Аан дойдуга маннык омук аҕыйах».
Ил Түмэн бэрэссэдээтэлэ билигин республикаҕа Михаил Николаев биир «Музыка для всех» бырайыага олоххо киирэн эрэрин бэлиэтээтэ.
«Музыканы баһылаан, киһи дууһата олус байар, билиитэ-көрүүтэ кэҥиир, - диэтэ Александр Жирков уонна өссө төгүл: - Биһиги 20 сыллааҕыта ууруллубут олук кэрэ бырааһынньыгар сылдьабыт», диэн бэлиэтээтэ.
Александр Жирков музыка Үрдүкү оскуолатын үөрэҕин чааһын сэбиэдиссэйигэр Вера Дьячковскаяҕа кыһыл көмүс чаһылаах парламент Бочуоттаах грамотатын туттарда.
Үбүлүөйдээх айар концерка Үрдүкү оскуола үөрэнээччилэрэ, уһуйааччылара, урукку кэмнэргэ бүтэрбиттэр, аан дойдутааҕы, Бүтүн Россиятааҕы конкурстар лауреаттара, «Виртуозы Якутии» скрипачтар, виолончелистар, флейтистар ансамбллара, камернай оркестр кытыннылар.
Комментарии
Авторизация на сайте через социальные сети