Манна оройуон социальнай-экономическэй сайдыытыгар үлэлиир, икки сыл устата оҥорон таһаарыыны үрдэппит, нолуокка иэһэ суох, аһымал уонна спонсорскай дьайыылары оҥорбут, тэрээһиннэргэ көхтөөхтүк кыттар нэһилиэктэр күрэхтэһэллэр.
«Сыл нэһилиэгэ» номинацияҕа Чуона, Ботуобуйа уонна Садын нэһилиэктэрэ киирбиттэрэ. Хас биирдии нэһилиэккэ балл туруорбуттара. Түмүгэр элбэх баллы ылан, Чуона нэһилиэгэ таҕыста, кинилэргэ 200 тыһыынча солкуобайы биэрдилэр. Салгыы Садын (100 тыһ. солк.) уонна Ботуобуйа нэһилиэктэрэ таҕыстылар (50 тыһ. солк.).
«Сыл фермерэ» конкурска икки фермерскэй хаһаайыстыба – «Эдем» уонна «Родник», үс родовой общиналар – «Чуона», «Сулакыыт» уонна «Куохаан» кытыннылар. Бастакы миэстэни уонна икки сүүс тыһыынча солкуобайы комиссия быһаарыытынан «Эдем» фермерскэй хаһаайыстыбаҕа биэрдилэр (Катаева Н.А. ИП), иккис уонна үһүс миэстэлэри уонна сүүс тыһыынча солкуобайы – «Родник» ХЭТ, үһүс миэстэни уонна 50 тыһыынча солкуобайы – Сүлдьүкээр родовой общината «Куохаан» ылла.
Наталья Катаева оройуоҥҥа соҕотох перепел көтөр сымыытын таһаарааччынан биллэр. Итини таһынан кини хаһаайыстыбата сибиинньэни иитэр, кэргэнинээн помидор, оҕурсу, хортуоппуй олордоллор. Наталья Александровналаах былааннара элбэх, сүрэхтэрэ-бэлэстэрэ да оннук.
«Куохаан» родовой община түүлээҕинэн дьарыктанар, ыһыахха уонна эбээн Бакалдын бырааһынньыгар куруутун спонсордыыр. Кыайыылаахтары үөрүүлээх наҕараадалааһын сиэрэ-туома сыл бүтүүтүгэр ыытыллыаҕа.
Комментарии
Авторизация на сайте через социальные сети