Культура, тырааныспар миниистирдэрэ Андрей Борисов, Семен Винокуров уонна Хаҥалас баһылыга Юрий Зайцев Егор Борисовка үлэ түмүктэниитин билиҥҥи туругун уонна чугас эргиннээҕи былааны билиһиннэрдилэр.

Саха сирин баһылыгын э.т. быйылгы Олоҥхо Ыһыаҕа дьон-сэргэ өйүгэр-санаатыгар, сүрэҕэр-дууһатыгар иҥэн, өйдөнөн хааларын туһугар Хаҥалас ыһыаҕын атыттартан ураты уонна хатылламат гына оҥорорго эттэ.

Эмиэ бу күн Покровскай куоракка «Олоҥхо Ыһыаҕа 2014» республикатааҕы тэрийэр бөлөх мунньаҕар Егор Борисов уонна улуус олохтоохторо кытыннылар.

Культура миниистирэ Андрей Борисов иһитиннэриитигэр, Орто дойду сирэ-уота Ыһыах сиэригэр-туомугар тилэри туһанылларын эттэ. Оннук, көрөөччүлэр хонууга олоруохтара, оттон сүрүн туруорууну хайа эниэтигэр көрдөрүөхтэрэ. Дьон трибуна миэстэтинэн хаарчахтаммакка, кэрэ көстүүлээх туруорунуу дуоһуйа көрүөҕэ-истиэҕэ.

Манна 1,5 тыһыынчаттан тахса артыыс кыттар. Андрей Саввич сабаҕалыырынан, көрөөччү ахсаана 50-60 тыһ. киһиэхэ диэри тиийиэҕэ.

Хаҥалас улууһун баһылыга Юрий Зайцев тутуу уонна өрөмүөн үлэтин уонна ол үбүлэниитин, Ыһыах бочуоттаах ыалдьытын, тас дойдулартан кэлбит дьон ахсаанын уонна кинилэри Ыһыах кэмигэр олохсутуу бэрээдэктэрин, о.д.а тустарынан кэпсээтэ.

Юрий Зайцев эппитинэн, «2 ГИС» киллэһиккэ майгынныыр, аналаах электроннай гаждеты бэлэмнии сылдьаллар. Манна туризм эбийиэктэрэ, Ыһыах былаана-схемата барыта тыктарыллыаҕа. Ону таһынан Ыһыах бырагыраамата, атын наадалаах иһитиннэриилэр киллэһиккэ ыйыллыахтара. Юрий Зайцев дьон ахсааныгар сабаҕалааһына Андрей Саввич гиэниттэн атын. Бэлиэ күҥҥэ 70 тыһ. тахса киһи кэлиэҕин туһунан барыллаан былаанныыр. Онон 10 тыһ. миэстэҕэ анаммыт массыына тохтуур сирэ наадатын кини ыйда.

Егор Борисов Ыһыах дьону-сэргэни түмэр, уопсастыбаны сомоҕолуур сыаллаах ыытылларын, инникитин да оннук буолуохтааҕын чиҥэтэн эттэ. Тэрийээччилэр итини учуоттууларын кини бэлиэтээтэ. Егор Афанасьевич баһаар куттала суоһаабатыгар, айылҕа, күн-дьыл туругун араас кубулҕатыгар бэлэм буоларга, ас-үөл хаачыстыбатын кытаанахтык хонтуруоллуурга, спортивнай күрэхтэһиилэри, дьон олорор усулуобуйатын, волонтердар үлэлэрин ситэри толкуйдуурга сорудахтаата.

Егор Борисов Эркээни хочото инникитин сайдыытыгар Орто Дойду сиригэр-уотугар ыытыллар улахан тэрээһин олугу, акылааты ууруохтааҕын бэлиэтээтэ.

Кэпсэтиһии, ырытыһыы кэмигэр тыа хаһаайыстыбатын министиэристибэтэ Хаҥалас дьаһалтатын кытта Өктөмҥө агротехнопарк тэрийэр былааннаахтарын туһунан эттилэр.  Оттон предпринимательство, туризм сайдыытыгар министиэристибэ Орто дойдуга туристическай-рекреационнай кластеры тэрийэр концепцияны оҥорбут. Бүгүҥҥү күҥҥэ ити бырайыактыыр докумуона оҥоһуллар.

Егор Борисов «Олоҥхо Ыһыаҕа 2014» республикатааҕы тэрийэр бөлөххө туһаайбыт этиитигэр бырааһынныкка кэлбит дьоҥҥо барытыгар эргиччи табыгастаах усулуобуйа үөскэтиллиэхтээҕин эттэ. Оннук, Ыһыах сиригэр-уотугар кэлии картата тута өйдөнүмтүө буоларыгар, кэлии-барыы хайа да өттүнэн харгыстамматыгар сорудахтаата.

Егор Борисов Орто Дойдуну кэлимсэ сайыннарыы бырагырааматын правительство бэлэмнииригэр эттэ. Ити түмүгэр бу сир дьону-сэргэни тардар күүһэ муҥутуурдук улаатыахтаах.

Орто дойдуга туристическай-рекреационнай кластеры аахсан туран «Умнас» суолу уларытарга кини эттэ. Ити тырааныспар министиэрситибэтигэр сыһыаннаах. Оттон предпринимательство министиэристибэтэ Эркээни хочотун бүтүннүүтүн хабар кэлимсэ этиилэри киллэрэригэр, ол иһигэр спорт кыһыҥҥы көрүҥнэрин сайыннарыы учуоттаннарын эттэ. Хаҥалас дьаһалтата тустаах министиэристибэлэри кытта сүөһүнү, сылгыны, о.д.а. кыылы-сүөлү иитии, үүнээйини олордуу курдук тыа хаһаайыстыбатын сайыннарыы бырагырааматын бэлэмнииллэрин бэлиэтээтэ.