Ыһыах саҕаланыытыгар улуус нэһилиэктэрин баһылыктара сахалыы маанытык таҥнан, хаҥыл ат үрдүгэр олорон киирбиттэрин, ыраах хоту уонна чугас улуустартан ыһыахха кэлбит ыалдьыттары дьон уруйдуу-айхаллыы көрүстэ.
Уостан уоска бэриллэн, үйэлэри уҥуордаан кэлбит номоххо хаалбытынан Эллэй аан бастаан бу улууска үктэммитэ, маҥнайгы ыһыаҕы манна ыспыта. Олоҥхо ыһыаҕын кэмигэр Эллэй Хаҥаласка кэлбит кэмин бу баардыы итэҕэтиилээхтик көрдөрдүлэр. Аал Кудук мас килбэйэр кииниттэн кини мустубут дьоҥҥо үөһээттэн түһүүтэ саха норуотун төрүттээбитин, үөскэппитин өйгө-санааҕа ойуулаан көрдөрдө. Тыһыынчаттан тахса кыттааччы Аал Кудук маска тахсан, тыыннааҕымсытыыта дьон-сэргэ өйүн өрүкүттэ, сүргэтин көтөхтө, санаатын кынаттаата.
Алгыс этии сиэрэ-туома ыһыахха солбуллубат миэстэни ылар. Уоту уматан, ынах араҕас арыытынын, сылгы сиэлинэн, саамал кымыһынан Аан алахчын Хотуну айах тутан, Айыылартан, иччилэртэн дьолу-соргуну, уйгуну-быйаҥы көрдөһүү, чахчыта да, ыһыахха ураты уонна сүрүн суолтаны ылар диирбин кытта үгүстэр сөбүлэһиэхтэрэ. Кындыа кыталык кыргыттары, тоҕус туруйа уолаттары арыаллатан киирбит алгысчыт норуотун, дьонун-сэргэтин туһугар Айыылар уйгу-быйаҥ, дьоллоох-соргулаах олоҕу түстүүллэригэр көрдөстө. Кутаалыы кытыастар уот нөҥүө тыл күүһүнэн эттэххэ, Айыылар истэллэр, ыра санааны, көрдөһүүнү ылыналлар уонна дьоҥҥо-сэргэҕэ ыыталлар диэн бигэтик итэҕэйиибит үйэ да усталаах кэм аастар, сууралла илик.
ЮНЕСКО эппиэттиир сэкэритээрэ Григорий Орджоникидзе, өрөспүүбүлүкэ түс-бас дьоно - баһылык э.т. Егор Борисов, Ил Түмэн бэрэссэдээтэлэ Александр Жирков, правительство бэрэссэдээтэлин солбуйааччы Феодосия Габышева, Хаҥалас улууһун баһылыга Юрий Зайцев, уо.д.а. истиҥник эҕэрдэлээтилэр, уус-уран айымньыбыт муҥутуур чыпчаалын – олоҥхобутун, ыһыахпытын, итэҕэлбитин харахпыт харатын курдук харыстаан, энчирэппэккэ, мөлтөппөккө инникитин да илдьэ сылдьарбытыгар аман алгыстарын анаатылар.
Өрөспүүбүлүкэ баһылыгын э.т. Егор Борисов Олоҥхо ыһыаҕын Ытык Дуоҕатын үөрүүлээх быһыыга-майгыга күөрэччи көтөҕөн туруорда.
Ыһыах сиэрэ-туома илии илииттэн, тоҥолох тоҥолохтон ыпсары ылсар оһуокайынан түмүктэннэ. Имигэс туттунуулаах, кынаттаах кэриэтэ үҥкүүһүттэр ыһыах сиэрин ситэрдилэр, кэрэтик киэргэттилэр.
Олоҥхо ыһыаҕар эҥин-эгэлгэ ис хоһоонноох 40 куонкурустарыгар кэлбит ыалдьыттар, улуус олохтоохторо сүргэлэрэ көтөҕүллэн, көхтөөхтүк кытыннылар, көрү-нары көҕүлүттэн туттулар.
Комментарии
Авторизация на сайте через социальные сети