Юрий Зайцев бэлиэ тэрээһиҥҥэ 25 эбийиэги бэлэмнээбиттэрин эттэ. «Манна баар эргэ тутууну барытын көтүрдүбүт уонна итилэр оннуларыгар саҥа этнографическай комплексы тутан таһаардыбыт. Инникитин комплекс улууска туризм сайдарыгар акылааты ууруохтаах», – диэтэ муниципалитет баһылыга.
Ыһыах буолуон иннинэ, бэс ыйын 18 күнүгэр, Покровскайга Арчы дьиэтэ аанын тэлэччи аһыаҕа. «Сиэр-туом толоруллар дьиэтэ олус интэриэһинэй быһыылаах-таһаалаах. Ону таһынан Олоҥхо дьиэтэ ыалдьыттары ыҥырыаҕа. Бэс ыйын 19 күнүгэр Ыһыахха уонна олоҥхоҕо анаммыт 12 таһаарыы сүрэхтэниэ. Эмиэ бу күн Өктөмҥө, Чапаевка, Нөмүгүгэ олоҥхоттон быһа тардан көрдөрүөхтэрэ», - диэтэ Надежда Скрябина.
Бэс ыйын 20 күнүгэр Ыһыах үөрүүлээхтик аһыллыа. Ыалдьыттар хонууга таалалыы олорон хайа эниэтигэр сүрүн туруорууну сэргии, сэҥээрэ көрүөхтэрэ. «Хаҥаластар ыһыахтарыгар куруук олус элбэх аты туттааччылар. Быйыл да, нэһилиэктэр баһылыктара бары атынан түһүлгэҕэ киириэхтэрэ. Онон ат симэҕин бэлэмнээбиттэрэ, тикпиттэрэ балачча буолла», – диэтэ баһылык.
300 киһи биир тэҥник ыллыаҕа, хомуска оонньоон дьүрүһүтүө. Ыһыахха эҥин-эгэлгэ 18 куонкурус ыытыллыаҕа. Ыалдьыттары күндүлүүргэ биэ кымыһын, быыппаҕы хото бэлэмнииллэр.
Ат сүүрдүүтүгэр ипподрому туталлар. Бэс ыйын 21 күнэ үүнэр күнүгэр сарсыарда 3.30 чааска күнү көрсүү сиэрэ-туома буолуоҕа. Бу күн Ыһыах үөрүүлээхтик сабыллыаҕа.
Ыһыахха 100-тэн тахса ыалдьыт Россия араас регионнарыттан, тас дойдулартан, ол иһигэр Крымтан кэлиэхтэрэ.
Тэрээһиҥҥэ быһа холуйан, 167 мөл. солк. туттулунна. Ол иһигэр 51 мөл. солк. - олохтоох, 90 мөл. солк. - республика, 8 мөл. 600 тыһ.солк. атын муниципалитеттар бюджеттарыттан, 19 мөл. солк. бюджеттан атын үптэн-харчыттан турар.
«Якутцемент» 1,5 мөл. солк. биэрбитэ. Атын компаниялар тэрээһиҥҥэ көхтөөхтүк кытталларыгар ыҥырыах этим», – диэтэ баһылык Юрий Зайцев.
Комментарии
Авторизация на сайте через социальные сети