Биһиги дьоммут оһуокай толоруутун маастарыстыбалара, таһымнара үрдүктүк сыаналанна. Дархан этээччи, Гиннесс оһуокайын таһаарбыт Прокопий Степанов Олоҥхо ыһыаҕын аһыллыытын сиэригэр-туомугар оһуокайы таһаарар чиэстэннэ. Хаҥалас сирин уруйдаан, кэлбит ыалдьыттары айхаллаан хоһоонун ситэрдэ, үҥкүүтүн таһаарда.
Розалия Тихонова «Түһүлгэлээх үҥкүүһүт» ааты ылла. Ким Федоров «Чаҕылхай аат» иккис степеннээх дипломант ааты сүктэ. Александр Степанов – «Хомоҕой тыллаах» аат иккис степеннээх дипломун тутта.
Оҕолорго Малдьаҕартан сылдьар Саша Кириллин оһуокайа биһирэннэ, көрөөччүлэр хайҕабылларын ылыан ылла. Араадьыйа кэрэспэндьиэннэрэ кинини сэргээн, этэр тылын ситэтин, толорутун истэн, кинини араадьыйаҕа уһуллулар.
Манна даҕатан эттэххэ, оҕолор күрэстэһиилэрэ сүрүн оһуокай кырдалыттан тэйиччи тэриллибитэ сатамньыта суох. Аҕа оһуокайдьыттар этэллэрин-тыыналларын истэн эдэр ыччат үөрэниэ, уһуйуллуо эбитэ буолуо. Уһулуччу талааннаах оһукайдыыр оҕолор бааллара бэлиэтэммэтэҕэ.
Комментарии
Авторизация на сайте через социальные сети