Бэс ыйын 21 күнэ. Таатта улууһа. Уолба. Олоҥхоһут М.Н.Андросова-Ионова төрөбүүтэ 150 сааһыгар анаммыт ыһыах.

Ыһыах Олоҥхо ыһыаҕын кытта биир күн ыытыллар. И.Слепцов аатынан спортивнай-культурнай комплекс дириэктэрэ Виктория Семенова эппитинэн, олоҥхоһут М.Н.Андросова-Ионова сиэннэрэ ыһыах бочуоттаах ыалдьыттарынан буолуохтара. Кинилэр Санкт-Петербург куораттан кэлиэхтэрэ. «Мария Андросова-Ионова эргиччи талааннаах киһи этэ. Олоҥхолуура да, ыллыыра да. Оннооҕор таһаҕасчыт буола сылдьыбыт кэмнээҕэ. Онон ыһыах куонкуруһугар дьон олоҥхоҕо, норуот ырыатыгар күөн көрсүөхтэрэ. «Бөҕө Маарыйа» уонна «Уолан Бэргэн» күрэстэһиилэр дьон-сэргэ болҕомтотун үөһүгэр туруохтара. Бастакы куонкурус спорт көрүҥнэригэр хас да түһүмэхтээх, ону таһынан хайа баҕарар жанрга фольклор айымньытын толорууга күрэхтэһиэхтэрэ. Кыайбыттарга саа, ювелирнай оҥоһук туттарыллар.

Бэс ыйын 23 күнэ. Бүлүү улууһа. Чинэкэ нэһилиэгэ. Социалистическай Үлэ Дьоруойа П.И.Протопопов 100 сааһыгар анаммыт ыһыах.

Чернышевскай (Чинэкэ) нэһилиэгин баһылыга  Артур Протопопов эппитинэн, үөрүүлээх тэрээһиҥҥэ сыһыары тутуллан Дьоруойдар сквердэрэ аһыллар.  «Биһиги нэһилиэкпитигэр Петр Протопопов уонна Семен Васильев - икки Социалистическай үлэ Дьоруойа баар. Петр Иванович төрөөбүт-үөскээбит Уотту алааһыгар мемориальная дуосканы туруоруохпут. Ону таһынан тыа хаһаайыстыбатын министиэристибэтин өйөбүлүнэн сүөһүнү аһатар базаны тэрийиэхпит. Ыһыах үгэс быһыытынан барыаҕа», - диэтэ кини.

Бэс ыйын 24-25 күннэрэ. Сунтаар улууһа. Сунтаар сэлиэнньэтэ.

Сунтаар ыһыаҕар Сергей Зверев-Кыыл Уолун сырдык кэриэһигэр анаан 500 киһи илиилэриттин ылсан, тоҥолохторуттан тирэнсэн оһуохайдыаҕа. Эһиил кини төрөөбүтэ 115 сылыгар 1000 киһи оһуохайдаан, рекорду олохтуур санаалаахтар. Сунтаар тэриллибитэ 250 сылыгар анаан Сунтаар Күөлүн таһыгар мэҥэ тааһы туруоруохтара. Ити туһунан СИА-ҕа улуус баһылыгын солбуйааччы  Зинаида Иванова эттэ. Сунтаар сэлиэнньэтин олохтоохторун туһунан кинигэ бэчээттэнэн тахсыаҕа, үлэһит, айар дьоҕурдаах дьону чиэстиэхтэрэ-бочуоттуохтара. Үбүлүөйгэ анаммыт куонкурустары, күрэхтэһиилэри сыл бүтүөр диэри ыытыахтара.

Бэс ыйын 26-28 күннэрэ. Бүлүү улууһа. Бүлүү куората. РФ-ҕа культура уонна Саха сиригэр Арктика сылларыгар анаммыт ыччат ыһыаҕа.

Ыһыахха 12 республикатааҕы куонкурустар ыытыллыахтара. Ол туһунан Бүлүү улууһун культураҕа управлениетыттан Эльвира Петрова эттэ. «Республика 30 улуустарыттан ыччаттары ыҥырдыбыт. Улуустар түһүлгэни киэргэтиигэ күрэстэһиэхтэрэ. Кыайбыт улууска сүрүн бириис — массыына. Ат сүүрдүүтүгэр эмиэ улахан күрэхтэһии күүтэр. Сүүрүк сиэнчэр аттары атыыластыбыт. Манна кыайыы көтөллөммүккэ сүрүн бириис эмиэ массыына, иккис миэстэҕэ — дьоҕус тыраахтар. Бүлүү улууһун боотурдарын куонкуруһугар кыайбыкка сүрүн бириис — массыына. Куолуһуттарга, олоҥхоһуттарга эмиэ күрэстэһиилэри ыытыахпыт. Ыччат ортотугар «Боотурдар оонньуулара» буолар. Ыһыах кэмигэр Бүлүүгэ учууталларга уонна доҕордоһууга анаммыт  аллея аһыллар. «Доҕордоһуу аллеятыгар ыһыахха кэлбит ыалдьыттар дойдуларыттан аҕалбыт бэлэхтэрин ууруохтара», – диэтэ кини. Бүлүү куоратын историятыгар, дьонугар-сэргэтигэр анаммыт кинигэ бэччээттэнэн тахсыаҕа.

Бэс ыйын 28-29 күннэрэ. Дьокуускай. Үс Хатыҥ. Туймаада республикатааҕы ыһыаҕа. Ыһыах бырагыраамата СИА порталыгар бэчээттэниэ.

От ыйын 3-4 күннэрэ. Амма улууһа. Соморсун нэһилиэгэ. Скороульскай буолас тэриллибитэ 375 сылыгар анаммыт ыһыах.

Соморсуннар быйылгы ыһыахтара уруккулартан уратылаах. Нэһилиэк баһылыгын солбуйааччы Надежда Белолюбская эппитинэн, нэһилэккэ Соморсун Боотурга анаммыт пааматынньыгы туруоруохтара.Амма улууһун Скроульскай буолаһыгар киирсибит Абаҕаттан, Мээндигэттэн, Эмистэн, Бөтүҥтэн кэлэн кыттыахтара. «Соморсун Боотур оонньуулара» ыытыллар. Онно кыайбыкка бириис — массыына. Кэрэ кыргыттар «Сардаана куо» уонна оһуохайдьыттар куонкурустарыгар кыайбыттарга — убаһа. Халадаай ырбаахылаах сүүрүүгэ бастаабыкка бириис — ньирэй. Хабыр хапсыһыылаах хапсаҕай, ат сүүрдүүтэ дьон болҕомтотун киинигэр туруохтара. Ыһыах олоҥхо киэһэтиттэн саҕаланар. Манна олоҥхоһуттар Валентин Исаков уонна Николай Баишев кыттыахтара.