Аһыллыы сиэригэр-туомугар, араас күрэстэргэ кытыннылар, кыайыы өрөгөйдөөх, бириис тутуурдаах дойдуларыгар кэллилэр. Барыта 40-тан тахса өрөспүүбүлүкэ, улуус таһымнаах күрэхтэр буоллулар.
Ыһыах бастакы күнүгэр «Оһуор – ойуу умсулҕана» быыстапка-дьаарбаҥкаҕа ньурбалар олус тэрээһиннээхтик кытыннылар: уус-уран оҥоһук эгэлгэтэ, иис арааһа, оҕуруо оҥоһуктар туруорулуннулар. Уус-уран оҥоһуктары биэс көрүнүнэн араартаан күрэх барда: кырадаһынтан таҥан төрүт иис, тирии, сарыы, оҕуруоттан оҥоһуктар; мастан, туостан ыһыах иһитэ-хомуоһа, мала-сала.
Мастан оҥоһук быыстапкатыгар кыттыыны ылбыт норуот маастара Владимир Саввинов бириистээх бастакы миэстэни ылла. Кини оҥоһуктара көрөөччүлэр уонна дьууллуур сүбэ улахан биһирэбиллэрин ыллылар. Элбэх киһи хаартыскаҕа түһэрдэ, атыылаһа сатаан ыйыталаста.
Оҕуруонан оҥоһуктарга Августина Петрова иккис миэстэни ылла, 10 тыһыынча суумалаах сертификатынан наҕараадаланна. Маны таһынан, кэтэхтэн кыттан биһиги биир дойдулаахтарбыт Аграфена Петрова - модельердар күрэхтэригэр, Акулина Гуляева – панно оҥоһуктарга кыттааччы сертификатын туттулар.
Иис культуратын, ойуу-мандар, симэх үгэстэрин киэҥник тэнитэн, дьон-норуот дьүүлүгэр таһааран «Оһуор-мандар ойуулаах саха танаһа» күрэххэ модельердар күөн көрүстүлэр. Манна биһиги маастарбыт Людмила Михайлова аныгылыы тупсарыллыбыт сахалыы таҥас түһүмэҕэр иккис миэстэни ылан үөрүүбүтүн үксэттэ. Дьэрэкээн симэхтээх сахалыы сон моделларын көрөөччүлэр ытыс тыаһынан уруйдаатылар, айхаллаан хаһыытаатылар.
Быыстапка-дьаарбанкаҕа кыттыбыт Ньурба талааннаахтара бары кыайыы ситиһиилээх кэллилэр, Ньурбабыт аатын ааттаттылар, диэн оройуон пресс-сулууспата иһитиннэрэр.
Комментарии
Авторизация на сайте через социальные сети