«Сахамедиа» республикатааҕы бэчээттиир, информационнай холдинг генеральнай дириэктэрин солбуйааччы, «Хаҥалас» түмсүү салайааччыта Афанасий Ноев бу күрэстэһии туһунан санаатын үллэһиннэ.
«Оһуокай күрэстэһиитигэр балаһыанньа быһыытынан 18-35-гэр диэри саастаах 22 кыттааччы оһуокайдыыр дьоҕурун мустубут дьоҥҥо көрдөрдө. Чугас сытар улуустары кытта тэҥнээтэххэ, Үөһээ Бүлүү, Сунтаар улуустарыттан олус көхтөөхтүк кытыннылар. Бүлүүгэ оһуокайга ураты болҕомтону уураллара тута харахха быраҕыллар.
Үөһээ Бүлүүттэн бэйэтэ талыы оһуокайдьыт, фольклорбут бу көрүҥүн киэҥник уонна дириҥник хайан тарҕатааччы Айталина Мойтохонова куонкуруска 6 оҕону кытыннарбытын таһынан 14 оҕону күрэстэһиини таһынан көрдөрө-иһитиннэрэ аҕалбытын биһирии бэлиэтиэх этим. Бу оҕолор улуус бастыҥнара хайдах эппиттэриттэн-тыыммыттарыттан элбэххэ үөрэммиттэрэ, такайыллыбыттара дьэҥкэ. Кини салайан иилээн-кэлбит оһуокайдьыттара Игнатьев Василий, Хомусарова Марианна, Алексеев Андрей, о.д.а. оһуокайдара куппутун тутта, сүргэбитин көтөхтө!", - диэтэ кини.
Үөһээ Бүлүүлэр утумнаах уонна бэриниилэх дьарыктара үтүө түмүктээх буолла. Кинилэр элбэх биһирэм бэлиэлэри туттулар.
Афанасий Ноев этэринэн, саха уран, эриэккэс тылын оһуокайга табыгастаахтык таҥан, наардаан, киэҥ түһүлгэҕэ оһуокайы аан бастакытын эппит Хомподоева Марина эдэрдэргэ тэҥнээҕин булбатах. Хаҥаластааҕы Олоҥхо ыһыаҕар эдэрдэр оһуокайдарыгар кини чаҕылхай сулус буолан суһумнаата. Дьүүллүүр Сүбэ «Саҥа аат таҕыста!», - диэн билинэн, биһирээн эппиттэр.
Аҕа саастаахтарга 82 хаарын быйыл санныгар уулларбыт, 14 оҕо амарах аҕата, 25 сиэн эйэҕэс эһэтэ, үлэ бэтэрээнэ Евстафий Аркадьев муҥутуур кыайыылааҕынан ааттанна уонна Синтай тыраахтарынан бириэмийэлэннэ.
Константин Тихонов (Нам), Зиновий Яковлев (Дьокуускай), Егор Егоров (Үөһээ Бүлүү) Олоҥхо Ыһыаҕын оһуокайы бастыҥ этээччилэринэн аатырыахтарын аатырдылар.
Комментарии
Авторизация на сайте через социальные сети