Кэпсэтии хайысхата Саха сиригэр олорор норуоттары, хоту улуустары сайыннарыы тула барда.
— Республикаҕа Арктика сылын биллэрэн, биһиги хоту улуустарбытыгар улахан болҕомтону уурар, онно миэстэтигэр промышленноһы уонна тыа хаһаайыстыбатын тэҥҥэ сөргүтэн сайыннарар соруктаахпыт. Онуоха дойду таһымыгар Арктика зонатын сайыннарыы стратегиятыгар эмиэ улахан эрэллээхпит, — диэн бэлиэтээтэ Егор Борисов көрсүһүү кэмигэр. Парламентарий үгүс тирээн турар боппуруостар субъектар баһылыктарын боломуочуйаларыгар киирбэтэ сыыһатын бэлиэтээтэ. Төрүт олохтоохтор кыһалҕаларын төрдүттэн билэр дьон туруорсууларынан, кэккэ федеральнай сокуоннарга уларытыы киирэригэр республика салалтатын кытта бииргэ үлэлээһин улахан суолталааҕын ыйда.
Григорий Ледков Саха сиригэр сырыытын биир көдьүүстээх түгэнинэн инникитин федеральнай бырайыактары олоххо киллэриигэ бииргэ үлэлээһиҥҥэ Дальнай Восток, Сибиир уонна Хоту сир аҕыйах ахсааннаах норуоттарын ассоциацията Саха сирин правительствотын кытта икки өрүттээх сөбүлэһии түһэрсиитэ буолар.
Госдума депутата Саха сирин Аҕыйах ахсааннаах төрүт норуоттарын ассоциациятын бэрэстэбиитэллэрин анаан көрсөн, тирээн турар сытыы боппуруостарга кинилэр санааларын иһиттэ. Кэпсэтии көхтөөх кыттааччыларыттан биирдэстэрэ, аҕыйах ахсаннаах норуоттар көһө сылдьар аҕа уустарын Ытык сүбэтин бэрэстэбиитэлэ Мария Винокурова туруорсар кыһалҕата — балыктааһын:
— 2009-2010 сылларга бас билээччитэ суох сири атыылыыр туһунан федеральнай сокуон тахсыбыта. Аукцион тэриллэн, итинник сирдэр атыыланаллар диэн. Биһиги ону кытта сөпсөспөппүт. Ити боппуруоһу Госдума депутатыгар аһаҕастык туруорустубут, — диэн эттэ Ытык сүбэ чилиэнэ.
Саха сирэ аҕыйах ахсааннаах норуоттар кыһалҕаларын быһаарыыны таһынан, төрүт норуоттар үгэстэрин уонна культураларын сайыннарыыга Россия үрдүнэн инники күөҥҥэ сылдьар. Саха сиригэр иккиһин кэлэ сылдьыбыт Госдума депутата Григорий Ледков, бэйэтэ омугунан ненец буолан, Арктика сирин-уотун үчүгэйдик билэрэ, аҕыйах ахсааннаах омуктар кыһалҕаларын чугастык ылынара өтө көстөр. Григорий Ледков: “Бу курдук аҕыйах ахсааннаах төрүт омук дьонун кытта сирэй көрсөн кэпсэтэр олус туһалаах. Маннык кэпсэтиилэртэн ыытыллыахтаах үлэ хайысхата торумнанар, кэскиллээх тосхол оҥоһуллар. Бултааһын уонна балыктааһын боппуруостарын быһаарыы, көһө сылдьар аҕа уустарын сирдэрин статуһун бигэргэтии, төрүт омуктар тылларын үөрэтиигэ болҕомтону ууруу курдук боппуруостары федеральнай таһымҥа туруорсуу – биһиги сүрүн сорукпут. Муус устарга Москваҕа бу сырыы түмүгүнэн “төгүрүк остуол” тэриллиэҕэ. Онно Саха сирин аҕыйах ахсааннаах төрүт норуоттара Арктиканы сайыннарыыга туһуламмыт санааларын учуоттуохпут уонна сокуон ылылларыгар кинилэр этиилэрэ төһүү буолуоҕа", — диэн суруналыыстарга иһитиннэрдэ.
12+
Комментарии
Авторизация на сайте через социальные сети